Sámediggi deaivvadii stáhtaráđi ovddasteaddjiid Helssegis
Sámedikki delegašuvdna deaivvadii mannan vahkus 25.-27.10. ságajođiheaddji Tuomas Aslak Juuso jođihemiin stáhtaráđi ovddasteaddjiid Helssegis. Deaivvademiid ulbmilin lei ovddidit ráđđehusa ja sápmelaččaid gaskasaš buori gulahallama ja ovttasbarggu Orpo ráđđehusprográmma čatnasumiid mielde.
Biras- ja dálkkádatministtar Kai Mykkänen ja ságajođiheaddji Tuomas Aslak Juuso.
Vahku áigge Sámedikki delegašuvdna deaivvadii stáhtaráđi ovddasteaddjiin biras- ja dálkkádatministtar Kai Mykkäsa (olgešb.), bealuštanministtar Antti Häkkäsa (olgešb.) ja bargoministtar Arto Satosa (olgešb). Deaivvademiin ledje sáhkan ovdamearkka dihte EU biodiversitehtasoahpamuša álbmotlaš čađaheapmi, Suoma NATO-lahttovuođa váikkuhusat sápmelaččaid ruovttuguovllus ja sámegielat bargiid oažžuma sihkkarastin erenoamážit surggiin, main lea bargiidváili.
– Ságastalaimet buođuslaččat máŋggalágan sápmelaččaid guoski áššeollisvuođain. Suokkardalaimet ovttas ovdamearkka dihte vugiid buoridit sámegielat vearjogeatnegasaid bálvalusaid ja dan, mo sápmelaččaid oasálašvuohta vuhtiiváldo dallego ođastit barggolašvuođadoaimmaid, ovdamearkka dihte go plánejuvvo mekanismmat maiguin buhttet rávesolbmuidoahpahusdoarjaga, muitala ságajođiheaddji Tuomas Aslak Juuso.
Deaivvadeamis johtolat- ja gulahallanministara (Lulu Ranne, VS) stáhtačálliin Marjo Lindgreniin sáhkan ledje ee. luoddafierpmádaga ja gulahallanoktavuođaid ortnet sápmelaččaid ruovttuguovllus, dego ovdamearkan luoddaoktavuođat Anár-Pokka ja Anár-Čeavetjávri gaskkas ja luoddafierpmádat Ohcejoga ja Gilbbesjávrri guovlluin. Olgoriikagávpe- ja ovddidanministara (Ville Tavio, VS) sierraveahkki Tuomas Tähtiin ságastallojuvvui erenomážit eamiálbmogiid birra Suoma ovddidanpolitihkas. Delegašuvdna deaivvadii maiddái ee. vuoigatvuođaministara (Leena Meri, VS) stáhtačálli Teija Makkosa sámediggelága ođastusa áigeplánain. Lassin Sámedikki ovddasteaddjit deaivvadedje virgeolmmošdásis sosiála- ja dearvvašvuođaministara (Kaisa Juuso, VS) sierraveahkki Hannu Peurasaari, geainna ságastallojuvvui ee. sámegielat ja kulturvuđot sode-bálvalusaid oažžuma dorvvasteamis erenoamážit sámegielat mielladearvvašvuođabálvalusaid oasil.
– Mii gávnnaimet deaivvademiin oktasaš dáhttodili máŋgga ášši ovddideapmái ovdamearkka dihte johtolat- ja gulahallanministeriijain. Sávange, ahte bures álgán ovttasbargu joatkašuvvá maiddái boahttevuođas ja mii gávdnat oktasaš čovdosiid máŋggain sápmelaččaid guoski áššiin, gávnnaha Juuso.
Sámedikki delegašuvdnii vahku áigge gulle ságajođiheaddji Tuomas Aslak Juuso, láhkačálli Kalle Varis, ealáhus- ja birasláhkačálli Sarita Kämäräinen, vs. birasčálli Tiina Lovisa Solbär, gielladorvočálli Anne Kirste Aikio, sosiála- ja dearvvašvuođačálli Anne Länsman-Magga ja ságajođiheaddji veahkkebargi Niina Siivikko. Lassin gáiddusoktavuođa bokte oassálasttiiga riikkaidgaskasaš áššiid čálli Inka Saara Arttijeff ja sosiála- ja dearvvašvuođačálli Kaisa Ruokojärvi.
Lassedieđut:
Tuomas Aslak Juuso
Ságajođiheaddji
040 687 3394
tuomas.juuso@samediggi.fi
