Sääʹmteʹǧǧ kaaunõõđi riikksuåvtõõzz eeʹttkõʹsttjivuiʹm Heʹlssnest
Saaǥǥjååʹđteei Tuomas Aslak Juusoin jååttam Sääʹmteeʹǧǧ delegaatio kaaunõõđi mõõnni neäʹttlest 25.-27.10. riikksuåvtõõzz eeʹttkõʹsttjivuiʹm Heʹlssnest. Kaaunõõttmõõžži täävtõsân leäi õõuʹdeed õõudårra ǩiõčči vuârrsaǥstõõllmõõžž da õhttsažtuâj halltõõzz da säʹmmlai kõõsk Orpo halltõsprograamm čõnnõõttmõõžži meâldlânji.
Pirrõs- da äimmõsminister Kai Mykkänen da saaǥǥjååʹđteei Tuomas Aslak Juuso.
Neäʹttel seʹst Sääʹmteeʹǧǧ delegaatio kaaunõõđi riikksuåvtõõzz eeʹttkõʹsttji pirrõs- da äimmõsminister Kai Mykkänein (kok), peälštõsminister Antti Häkkänein (kok) di tuâjjminister Arto Satonein (kok). Äʹššen kaaunõõttmõõžžin leʹjje õuddmiârkkân EU biodiversiteʹttsuåppmõõžž meersaž tåimmapiijjmõš, Lääʹdd NATO-vuäzzlažvuõđ vaaiktõõzz säʹmmlai dommvuuʹdest di sääʹmǩiõllsai tuâjjlai vuäǯǯmõõžž staanmõš aainâs tuâjjviõkkvääʹnes suõʹrjin.
– Meeʹst leʹjje heeđlmallaž vuârrsaǥstõõllmõõžž määŋgnallšem säʹmmlaid kuõskki äʹššobbvuõđin. Smiõttim õõutsââʹjest õuddmiârkkân naaʹlid pueʹreed sääʹmǩiõllsai sääldti kääzzkõõzzid di tõn, mõõn nalla säʹmmlai vuässadvuõđ vääʹldet lokku reâuggvuõtt-tooiʹmid oođeʹmmen, õuddmiârkkân vuõrâs-škooultõstuärj koʹrvveei mekaniismid plaanmen, särnn saaǥǥjååʹđteei Tuomas Aslak Juuso.
Kaaunõõttmõõžžâst jååttlõk- da saaǥǥtem-ministeeʹrin (Lulu Ranne, PS) riikkpiisar Marjo Lindgrenin äʹššen leʹjje jm. čuâǥǥas-säimmõõzz da saaǥǥtemõhttvuõđi vueʹǩǩ säʹmmlai dommvuuʹdest, mâʹte õuddmiârkkân čuâǥǥasõhttvuõđ Aanar-Pokka da Aanar-Čeʹvetjäuʹrr kõõskin di čuâǥǥas-säimmõs Uccjooǥǥ da Kilpisjärvi vuuʹdin. Ålggjânnamkaupp- da õõuʹdeem-ministeeʹr (Ville Tavio, PS) spesiaalvieʹǩǩteei Tuomas Tähtin saǥstõʹlleš jeäʹrben alggmeerai pirr Lääʹdd õõuʹdeempolitiikkâst. Delegaatio kaaunõõđi še jm. vuõiggâdvuõttministeeʹr (Leena Meri, PS) riikkpiisar Teija Makkonein sääʹmteʹǧǧlääʹjj oođõõzz äiʹǧǧtaauli diõtt. Lââʹssen Sääʹmteeʹǧǧ eeʹttkõʹstti kaaunõʹtte veʹrǧǧneǩtääʹzzest sosiaal- da tiõrvâsvuõttministeeʹr (Kaisa Juuso, PS) spesiaalvieʹǩǩteei Hannu Peurasaarin, ǩeäin saǥstõʹlleš jm. sääʹmǩiõllsaž da kulttuurmeâldlaž soti-kääzzkõõzzi vuäǯǯamvuõđ staanmõõžžâst jeäʹrben sääʹmǩiõllsaž miõlltiõrvâsvuõttkääzzkõõzzi peäʹlnn.
– Kaaunim kaaunõõttmõõžžin õhttsaž täätt määŋg ääʹšš õõuʹdummša õuddmiârkkân jååttlõk- da saaǥǥtem-ministeriain. Tuäivam aainâs, što puârast jåttjam õhttsažtuâjj juätkkai še puäʹđlvest da kaunnâp õhttsaž čåuddmõõžžid määŋgain säʹmmlaid kuõskki aaʹššin, tuâtt Juuso.
Sääʹmteeʹǧǧ delegaatiost neäʹttel ääiʹj leʹjje saaǥǥjååʹđteei Tuomas Aslak Juuso, lääʹǩǩpiisar Kalle Varis, jieʹllemvueʹǩǩ- da pirrõslääʹǩǩpiisar Sarita Kämäräinen, vs. pirrõspiisar Tiina Lovisa Solbär, ǩiõllstaanpiisar Anne Kirste Aikio, sosiaal- da tiõrvâsvuõttpiisar Anne Länsman-Magga di saaǥǥjååʹđteei vieʹǩǩteei Niina Siivikko. Ougglõsõhttvuõđivuiʹm vuässõʹtte veâl meeraikõskksaž aaʹšši piisar Inka Saara Arttijeff di sosiaal- da tiõrvâsvuõttpiisar Kaisa Ruokojärvi.
Lââʹssteâđ:
Tuomas Aslak juuso
Saaǥǥjååʹđteei
040 687 3394
tuomas.juuso@samediggi.fi
