Sämitigge tuáivut luho 70-ihásii Sämirááđán

Sämirääđi lii ive 1956 vuáđudum aalmuglâšservi já ohtâ puárásumos já kuhemustáá toimâm algâaalmugservi. Rääđi tuáimá Taažâ, Ruotâ, Suomâ já Ruošâ sämmilij aalmuglâšseervij oovtâstpargo-orgaanin. Suomâbeln Sämirääđi jesânin tuáimá Suomâ sämmilij kuávdášservi (SSK). Sämirääđi lii Arktâsii rääđi pisovâš jeessân oovtâst viiđáin eres algâaalmugservijn.

– Mun halijdâm lieggâsávt tuáivuttiđ luho Sämirááđán ton 70 ive pargoost sämmilij vuoigâdvuođâi, kulttuur já oovtâstpargo ovdedem oovdân raajij rasta. Suomâbel Sämitiggeest já Sämirääđist lii meid ohtsâš historjá, tastko Sämitige ovdedeijee Säämi Parlament já Sämitigge ovdâstii Suomâbel sämmilijd Sämikonferensijn 1990-lovo loopâ räi, iätá Sämitige saavâjođetteijee Pirita Näkkäläjärvi.

Totkeetuáhtár Saara Alakorva (Suomâ Akatemia ruttâdem tutkâmuš njunošohtâdâh MULTIBEING, Laapi ollâopâttâh) muštâl, ete Suomâ Sämitige ovdedeijee Säämi Parlament – vuossâmužžân ovdâstuslâžžân sämiornijdummeen, lâi oovdâstmin Suomâ sämmilijd Sämikonferensijn, tastko valjâiguin valjimnáál sämiornijduumijd ideistii meid Sämirääđist tollum ráđádâlmijn.

– Suomâ Sämitiggeest lâi ovdâstus konferensist vala ihán 1998 räi. Tast maŋa meid Suomâ sämmilijd láá konferensijn ovdâstâm tuš seervih já toi kuávdášservi (SSK), mon juávhust väljejuvvojeh ovdâsteijeeh Sämirááđán. Jesânij valjim jyehi enâmist seervij vuáđuld nanodij Sämirääđi rooli eidu sämmilii aalmugohtsâškode kuávdáš tuáimen raajij rasta, ko vuod sierâ staatâi Sämitigeh nanodeh parlamentaarlii oovtâstpargos, iätá totkeetuáhtár Alakorva.

Totkeetuáhtár Saara Alakorva tuálá luvâlduv Sämirääđi historjást 23. Sämikonferensist.

Sämitige ovdâsteijeeh uásálisteh aktiivlávt juhleoho tilálâšvuođáid

Sämiräädi juhleohhoost láá maaŋgah tábáhtusah, moid meid Suomâ Sämitige ovdâsteijeeh uásálisteh.

Saavâjođetteijee Pirita Näkkäläjärvi oovdâst Sämitige 23. Sämikonferensist. Sun tuálá Suomâ Sämitige tiervâttâs lekkâmtilálâšvuođâst tuorâstuv 18.6. já uásálist Taažâ, Ruotâ já Suomâ Sämitiigij saavâjođetteijei panelân vástuppeeivi 19.6.

Sämitige nuorâirääđi värisaavâjođetteijee Ellen Saijets uásálist säminuorâi Gávnnadeapmi 3 -konferensân, mii álgá vuossaargâ 15.6.

Meid Sämitige kulttuurlävdikode värisaavâjođetteijee Niko Valkeapää uásálist juhletuáloid. Sun juáhá Maarit Länsmanân kulttuurpalhâšume vástuppeeivi 19.6. tme 17 rääjist Ohcejohka Šearrá -tábáhtus ooleest Onnela Törmäst. Kulttuurpalhâšume juáhhoo oovtâstpargoost Ucjuv kieldáin.

Sämitige jeessân Janne Hirvasvuopio uásálist täsiárvupanelân lávurduv 20.6.

Sämitige kulttuurčällee Riitta Orti-Berg uásálist konferensoho ääigi maŋgáid tábáhtussáid, tego Sämitige torjum KulturSápmi-tábáhtusân, mii álgá majebaargâ 16.6. Duodji Akademiija 2027 -haavâ vuávájeijee Birit Tornensis uásálist KulturSápmi -tábáhtusân já tuálá tuorâstuv 18.6. pargopáájá sämityeje (duodji / tyeji / ǩiõtt-tuâjj) eettisijn ravvuin.

• Luuvâ lase: Sämmilij 23. Konferens (saamicouncil.net)

Lasetiäđuh:

Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi