Sääʹmteʹǧǧ ääʹjast leekk 70-ekksa Sääʹmsuåvtõʹsse

Sääʹmsuåvtõs lij eeʹjjest 1956 rajjum meerlažorganisaatio da õhtt vuäʹmmsummus da kuuʹǩǩben tåimmjummšest åårrai alggmeerorganisaatio. Suåvtõs tåimm Taarr, Ruõcc, Lääʹdd da Ruõšš säʹmmlai meerlažorganisaatioi õhttsažtuâjjorgaanân. Lääʹdd beäʹlnn Sääʹmsuåvtõõzz vuäzzliʹžžen tåimm Lääʹdd säʹmmlai kõõskõsorganisaatio (SSG). Sääʹmsuåvtõs lij Aarktlaž suåvtõõzz põõšši vuäzzlaž õõutsââʹjest viiđ jeeʹres alggmeerorganisaatioin.

– Haaʹlääm äʹjsted leekk ǩeʹnnvânji Sääʹmsuåvtõõzz tõn 70-ekksaž tuâjast säʹmmlai vuõiggâdvuõđi, kulttuur da õhttsažtuâj ooudâsviikkmõššân raajid râstldeeʹl. Lääʹdd beäʹl Sääʹmteeʹǧǧest da Sääʹmsuåvtõõzzâst liâ še õhttsa histoor ǥu Sääʹmteeʹǧǧ oudldõʹstti Sääʹm parlameʹntt da Sääʹmteʹǧǧ eeʹttkõʹstte Lääʹdd beäʹl säʹmmlaid Sääʹmkonfereeʹnsest 1990-lååǥǥ loopp räjja, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.

Tuʹtǩǩeeʹjjtohtor Saara Alakorva (Lääʹdd Akatemia teäggtem tuʹtǩǩummuž njoonašjuâǥǥas MULTIBEING, Lappi universiteʹtt) särnn, što Lääʹdd Sääʹmteeʹǧǧ oudldõʹstti Sääʹm parlameʹntt – vuõssmõs eeʹttkâsttmallaž sääʹmorganisaationalla, leäi eeʹttkâʹsttmen Lääʹdd säʹmmlaid Sääʹmkonfereeʹnsest, ǥu vaalin vaʹlljeemnalla åårrai sääʹmorganisaatioid ideõʹstte še Sääʹmsuåvtõõzzâst jiõllum saǥstõõllmõõžžin.

– Lääʹdd Sääʹmteeʹǧǧest leäi eeʹttkâsttmõš konfereeʹnsest veâl eeʹjj 1998 räjja. Tõn mâŋŋa še Lääʹdd säʹmmlaid liâ konfereeʹnsest eeʹttkâsttam tåʹlǩ õhttõõzz da tõi kõõskõsorganisaatio (SSG), koon seʹst eeʹttǩeeʹjid sääʹmsuåvtõʹsse vaʹlljeet. Vuäzzlai vaʹlljummuž juõʹǩǩ jânnmest õhttõsvuâđ mieʹldd raavii Sääʹmsuåvtõõzz rool nuʹt säärneeʹl sääʹm meerlažõhttsažkååʹdd kõskksummus raajjrâstldeeinallšeʹmmen tåimmjen, ǥu âʹpet jeeʹres riikkin operõõʹsti sääʹmteeʹǧǧ raavee parlamentaarlaž õhttsažtuâjas, särnn tuʹtǩǩeeʹjjtohtor Alakorva.

Tuʹtǩǩeeʹjjtohtor Saara Alakorva loǥlmâstt Sääʹmsuåvtõõzz histoorâst 23. Sääʹmkonfereeʹnsest.

Sääʹmteeʹǧǧ eeʹttǩeeʹj vuässâʹtte aktiivlânji juʹhllneäʹttel pooddid

Sääʹmsuåvtõõzz juʹhllneäʹttlest liâ mäŋgg šõddmõõžž, koid še Lääʹdd Sääʹmteeʹǧǧ eeʹttǩeeʹj vuässâʹtte.

Saaǥǥjååʹđteeʹjj Pirita Näkkäläjärvi eeʹttkâstt Sääʹmteeʹǧǧ 23. Sääʹmkonfereeʹnsest. Son põhtt Lääʹdd Sääʹmteeʹǧǧ tiõrvʼvuõđ ääʹveempooddâst nelljdpeeiʹv 18.6. da vuässââtt Taarr, Ruõcc da Lääʹdd Sääʹmteeʹǧǧ saaǥǥjååʹđteeʹji paneeʹl poʹdde piâtnâc 19.6.

Sääʹmteeʹǧǧ nuõrisuåvtõõzz väärrsaaǥǥjååʹđteeʹjj Ellen Saijets vuässââtt sääʹmnuõri Gávnnadeapmi 3 -konferenssa, kååʹtt älgg vuõssaarǥ 15.6.

Še Sääʹmteeʹǧǧ kulttuurluʹvddkååʹdd väärrsaaǥǥjååʹđteeʹjj Niko Valkeapää vuässââtt juʹhllvuõđid. Son juâkk Maarit Länsman kulttuurciist piâtnâc 19.6. čiâss 17 ääʹljeeʹl Ohcejohka Šearrá -šõddmõõžž õhttvuõđâst Onnela Törmäst. Kulttuurciist jueʹjjet õhttsažtuâjast Uccjooǥǥ kooʹddin.

Sääʹmteeʹǧǧ vuäzzlaž Janne Hirvasvuopio vuässââtt tääʹss-ärvvpaneeʹl poʹdde sueʹvet 20.6.

Sääʹmteeʹǧǧ kulttuurpiisar Riitta Orti-Berg vuässââtt konfereʹnssneäʹttlest määŋgaid šõddmõõžžid, håʹt mâka Sääʹmteeʹǧǧ tueʹrjjeem KulturSápmi-šõddmõʹšše, kååʹtt älgg mââibaarǥ 16.6. Duodji Akademiija 2027 -haʹŋǩǩõõzz plaaneeʹjj Birit Tornensis vuässââtt KulturSápmi -šõddmõʹšše da âânn neljdpeeiʹv 18.6. tuâjjpääʹj sääʹmǩiõtt-tuâj (duodji / tyeji / ǩiõtt-tuâjj) eettlaž vuäppõõzzin.

• Looǥǥ lââʹzz: Säʹmmlai 23. Konfereʹnss (saamicouncil.net)

Lââʹssteâđaid oudd:

Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi