Sámediggi sávvá lihku 70-jahkásaš Sámiráđđái
70-jahkásaš Sámiráđđi ávvuduvvo 23. Sámekonferánssas Ohcejogas 18.–21.6.2026. Konferánsavahku áigge Sámiráđđi lágida maid eará sámi kulturdáhpáhusaid. Sámedikki ovddasteaddjit oassálastet aktiivvalaččat ávvuvahku dáhpáhusaide.
Govva: Sámiráđđi
Sámiráđđi lea jagis 1956 vuođđuduvvon siviilaorganisašuvdna ja okta boarrásamos ja guhkimus áigge doaibman álgoálbmotorganisašuvnnain. Ráđđi doaibmá Norgga, Ruoŧa, Suoma ja Ruošša sápmelaččaid siviilaorganisašuvnnaid ovttasbargoorgánan. Suoma bealde Sámiráđi lahttun doaibmá Suoma sámiid guovddášsearvi (SSG). Sámiráđđi lea Árktalaš ráđi bissovaš lahttu ovttas viđa eará álgoálbmotorganisašuvnnain.
– Háliidan sávvat liekkus lihkusávaldagaid Sámiráđđái dan 70-jahkásaš barggus sápmelaččaid vuoigatvuođaid, kultuvrra ja ovttasbarggu ovddideami várás riikkarájáid rastá. Suoma beale Sámedikkis ja Sámiráđis lea maid oktasaš historjá, dasgo Sámedikki ovdavázzi Sámi parlameanta ja Sámediggi ovddastedje Suoma beale sápmelaččaid Sámekonferánssain 1990-logu loahpa rádjai, dadjá Sámedikki ságajođiheaddji Pirita Näkkäläjärvi.
Dutkidoavttir Saara Alakorva (Suoma Akademiija ruhtadan dutkamuša njunušovttadat MULTIBEING, Lappi universitehta) muitala, ahte Suoma Sámedikki ovdavázzi Sámi parlameanta – vuosttas ovddasteaddji sámeorganisašuvdnan, lei ovddasteamen Suoma sápmelaččaid Sámekonferánssain, daningo válggain válljejuvvon sámeorganisašuvnnaid birra ledje jurdagat maiddái Sámiráđi ságastallamiin.
– Suoma Sámedikkis lei ovddastus konferánssas gitta jahkái 1998. Dan maŋŋá maid Suoma sápmelaččaid leat konferánssain ovddastan dušše searvvit ja daid guovddášsearvi (SSG), man gaskavuođas ovddasteaddjit Sámiráđđái válljejuvvojit. Lahtuid válljen guđege riikkas servviin nannii Sámiráđi rolla namalassii sámi siviilaservodaga guovddáš rájáid rasttildeaddji doaibmin, go fas sierra riikkain doaibmi Sámedikkit nannejedje parlamentáralaš ovttasbargguset, dadjá dutki doavttir Alakorva.
Dutkidoavttir Saara Alakorva logaldalai Sámiráđi historjjás 23. Sámekonferánssas.
Sámedikki ovddasteaddjit oassálaste aktiivvalaččat ávvuvahku dilálašvuođaide
Sámiráđi ávvuvahkus leat máŋggat dáhpáhusat, maidda maiddái Suoma Sámedikki ovddasteaddjit oassálastet.
Ságajođiheaddji Pirita Näkkäläjärvi ovddasta Sámedikki 23. Sámekonferánssas. Son doallá Suoma Sámedikki dearvvahusa rahpandilálašvuođas duorastaga 18.6. ja oassálastá Norgga, Ruoŧa ja Suoma Sámedikkiid ságajođiheaddjiid panelaságastallamii bearjadaga 19.6.
Sámedikki nuoraidráđi várreságajođiheaddji Ellen Saijets oassálastá sámenuoraid Gávnnadeapmi 3 -konferánsii, mii álgá vuossárgga 15.6.
Maiddái Sámedikki kulturlávdegotti várreságajođiheaddji Niko Valkeapää oassálastá ávvudilálašvuođaide. Son juohká Maarit Länsmana kulturbálkkašumi bearjadaga 19.6. dii. 17 rájes Ohcejohka Šearrá -dáhpáhusa oktavuođas Gieddemielli dearpmi alde. Kulturbálkkašupmi juhkkojuvvo ovttasráđiid Ohcejoga gielddain.
Sámedikki lahttu Janne Hirvasvuopio oassálastá dásseárvopanelii lávvardaga 20.6.
Sámedikki kulturčálli Riitta Orti-Berg oassálastá konferánsavahkus máŋggaide dáhpáhusaide, dego KulturSápmi-dáhpáhussii, man Sámediggi doarju ja mii álgá maŋŋebárgga 16.6. Duodji Akademiija 2027 -prošeavtta plánejeaddji Birit Tornesis oassálastá KulturSápmi -dáhpáhussii ja doallá duorastaga 18.6. bargobáji sámeduoji (duodji / tyeji / ǩiõtt-tuâjj) ehtalaš rávvagiin.
- Loga eanet: Sápmelaččaid 23. Konferánsa (saamicouncil.net)
Lassidieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
