Sämitigge tuđâvâš Laapi lito váldustiivrâ miärádâsân macâttiđ Tave-Laapi eennâmkoddekaava valmâštâlmân

Laapi lito váldustivrâ meridij onne 17. vyesimáánu macâttiđ Tave-Laapi eennâmkoddekaava valmâštâlmân. Váldustivrâ meridij ääšist jienâiguin 43-3. Miärádâs mield sikkoh Jieŋâmeerâ rađan kyeskee merkkiimijd puáttee eennâmkoddekaavast.

Sämitigge lii tuđâvâš Laapi lito váldustiivrâ miärádâsân macâttiđ Tave-Laapi eennâmkoddekaava 2040 uđđâsist valmâštâlmân. Puáttee eennâmkoddekaavast sikkoh merkkiimijd, moh kyeskih Jieŋâmeerâ rađan.

Sämitige saavâjođetteijee Tuomas Aslak Juuso illood, ete systemaatlâš já iäljáris pargo, mii lii jotkum maaŋgâid iivijd, lii finnim puáttus. – Mun lam eromâš ilolâš, ete váldustiivrâ jesâneh láá kuullâm mii jienâ já meridâm visásmittiđ sämikulttuur já ärbivuáválij iäláttâsâi puátteevuođâ já sikkoh rađemerkkiimijd kaavast. Taat addel osko toos, ete Laapist ulmuuh iä lah vájáldittâm Säämi aalmug, veikâ valmâštâlmist láá systemaatlávt viggâm rađelinjim tuhhiitmân, iätá Juuso.

Sämitige I värisaavâjođetteijee Anni Koivisto uásálistij váldustiivrâ čuákkimân, mast joođhij Sämitige noonâ uáivil oovdânpyehtim. – Pyeri, ete sij kullii sämmilij huolâid já valdii taid tuođâst. Mun halijdâm kijtteđ Laapi lito váldustiivrâ já puohâid, kiäh láá toimâm ääši ovdedem pyerrin. Lii tuođâi tehálâš, ete oles kuávlu tuáimeeh kyeddih ohtsii ovdâsvástádâs sämikulttuur puátteevuođâst, paahud Koivisto.

– Mij lep tuođâi hiälpáskâm, ete sikkoh eennâmkoddekaavast merkkiimijd, moh kyeskih Jieŋâmeerâ rađan. Olášuudijn rađe ličij jottáám puoh kuulmâ sämikielâjuávhu váimuskuávlui rasta. Mun tuáivum, ete miärádâs naanood nuorâi osko puátteevuotân já toos, ete sämmilij päikkikuávlust puáhtá puátteevuođâst-uv finniđ pargo sämmilij ärbivuáválijn iäláttâsâin, juátká II värisaavâjođetteijee Leo Aikio.

Jieŋâmeerâ rađemerkkim lii finnim viijđes vuástálistem

Sämitigge já maaŋgah eres peleh láá maŋgii sierâ uáivilijn já ciälkkámušâin puáhtám oovdân, ete sij vuástálisteh Jieŋâmere rađe merkkim eennâmkoddekaavan ubâ raavâlâžžân. I värisaavâjođetteijee Anni Koivisto lii uásálistám Sämitige nomâttem äššitobdeejesânin Laapi lito stiivrâ čuákkimáid já sun lii puáhtám meid tobbeen oovdân sämmilij uáinuid rađelinjimist. Toos lasseen jotolâh- já viestâdemministeriö tovâttem čielgiittâsâst lii pahudum, ete Jieŋâmeerâ rađe ij kannat ekonomâlávt.

Sämitigge keesij njuhčâmáánust 2021 Laapi lito váldustiivrân vâi tot sihoččij Jieŋâmeerâ rađe linjim eennâmkoddekaavast ton maŋa, ko Laapi Lito stivrâ meridij oovdânpyehtiđ eennâmkoddekaava tuhhiittem váldustiivrân.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso(at)samediggi.fi 

Anni Koivisto
I värisaavâjođetteijee
040 415 5969
anni.koivisto(at)samediggi.fi

Leo Aikio
II värisaavâjođetteijee
040 621 6505
leo.aikio(at)samediggi.fi

Kove: Ville-Riiko Fofonoff