Sämitigge valmâštâlškuát uđđâsist ornimnáál vaaljâid – Stivrâ iävtut valjâlävdikode uđđâsist nomâttem kesimáánu vaaljâi várás

Sämitige stivrâ kieđâvušâi čuákkimstis 27.3.2024 paijeelmiärálâš äššin alemuu haldâttâhrievti miärádâsâid, moiguin AHR meridij merkkiđ 72 olmožid Sämitige ive 2023 valjâluvâttâlmân já orniđ uđđâsist sämitiggevaaljâid.

Saavâjođetteijee Pirita Näkkäläjärvi muštâl, ete Sämitigge valmâštâlškuát uđđâsist ornimnáál vaaljâid, maid lii tárguttâs toollâđ kesimáánust 2024.

– Äigi lii uccáá já pargo lii vättee, tastko vaaljâi orniistâlmijd kalga algâttiđ tállân. Misthân lii taggaar tile, ete ive 2023 vaaljâid ornim valjâlävdikode toimâpaje kiergânij eidu nuuhâđ 31.12.2023, saavâjođetteijee Näkkäläjärvi iätá.

Oovdeb valjâlävdikoodán iävtuttuvvoo jotkâ

Sämitige stivrâ meridij, ete tot iävtut Sämitige olesčuákkimân, ete olesčuákkim noomât ive 2023 sämitiggevaaljâin västidâm valjâlävdikode uđđâsist pargosis vaaljâi ornim várás kesimáánust 2024. Sämitige čuávuvâš olesčuákkim lii 12.4.2024.

– Mij adeliččijm mielâstân uđđâsist ornimnáál vaaljâid moonnâm paajeest toimâm valjâlävdikode hoittámnáál, saavâjođetteijee Näkkäläjärvi iätá.

Sämitiggelaavâ já AHR miärádâs mield uđđâsist ornimnáál vaaljâi tooimâtmist huolât, jis máhđulâš, siämmáš valjâlävdikodde ko komettum vaaljâin.

Stiivrâ mield sämmilij jiešmeridemvuoigâdvuotâ ij valagin olášuu valjâluvâttâllâmääšist

Sämitige stivrâ algâttij čuákkimstis AHR miärádâsâi analyys.

– Kalga ettâđ, ete Sämitige stiivrâ uáinu mield valjâluvâttâllâmääšist lii ain verivuotâ. Sämmilij jiešmeridemvuoigâdvuotâ ij valagin olášuu, ij meid AHR uđđâsumos miärádâsâi maŋa, saavâjođetteijee Näkkäläjärvi iätá.

Saavâjođetteijee Näkkäläjärvi huámmášut, ete taan äššiolesvuođâ tááhust merhâšittee AHR ihekirjemiärádâsâst AHR 2024:44 jienâstii jienâiguin 5-2 já miärádâsâst pahudui, ete ääšist lii riävtálâš epičielgâsvuotâ.

– Čoovdâ ain orroo olmoošvuoigâdvuotâluávkkáámij čuávdusân lii sämitiggelaavâ rievdâdem västidiđ Suomâ čannee olmoošvuoigâdvuotâkenigâsvuođâid. Tienuuvt ruossâlâs tile čuávdoo já tile rávhuttuvá, saavâjođetteijee Näkkäläjärvi iätá.

Sämitige stivrâ juátká AHR miärádâsâi analysistem já meerrid máhđulijn jotkâtooimâin maŋeláá.

AHR miärádâs mield uđđâsist ornimnáál valjáid kalga toohâđ uđđâ iävtukkâsasâttâllâm. Algâmudo árvuštâllâm mield iävtukkâsucâmušâid kalga toimâttiđ majemustáá 1.5.2024. Uđđâsist ornimnáál vaaljah láá 1.–30.6.2024.

Sämitiggelaavâ já AHR miärádâs mield komettum vaaljâin väljejum Sämitige jesâneh, värijesâneh já eres toimâorgaanij jesâneh pisoh jieijâs pargoin, tassaaš ko uđđâsist ornimnáál vaaljâi puáđus lii nannejum já staatârääđi lii puáttus mield meridâm Sämitige jesânijd jieijâs pargoid.

Lasetiäđuh:

Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi