Sámediggi álgá válmmaštallat válggaid ođđasit ordnema – Stivra evttoha válgalávdegotti ođđasit nammadeami geassemánu válggaid várás

Sámedikki stivra gieđahalai čoahkkimis 27.3.2024 badjelmearálaš áššin alimus hálddahusrievtti mearrádusaid, maiguin AHR mearridii merket 65 olbmo Sámedikki jagi 2023 válgalogahallamii ja ordnet sámediggeválggaid ođđasit.

Ságajođiheaddji Pirita Näkkäläjärvi muitala, ahte Sámediggi álgá válmmaštallat válggaid ođđasit ordnema, maid galgá čađahit geassemánus 2024.

– Áigi lea unnán ja bargu gáibida olu, go válggaid ordnema ferte álggahit dalán. Mis lea dakkár dilli, ahte jagi 2023 válggaid ordnen válgalávdegotti doaibmabadji nogai aiddo 31.12.2023, ságajođiheaddji Näkkäläjärvi dadjá.

Evttohuvvo, ahte ovddit válgalávegoddi joatká

Sámedikki stivra mearridii, ahte dat evttoha Sámedikki dievasčoahkkimii, ahte dievasčoahkkin nammada jagi 2023 sámediggeválggain vástidan válgalávdegotti ođđasit doaibmasis válggaid ordnema várás geassemánus 2024. Sámedikki čuovvovaš dievasčoahkkin ordnejuvvo 12.4.2024.

– Mii luohtášeimmet millosit válggaid ođđasit ordnema mannan bajis doaibman válgalávdegoddái. Ságajođiheaddji Näkkäläjärvi dadjá.

Sámediggelága ja AHR mearrádusa mielde válggaid ođđasit ordnemis fuolaha, jos vejolaš, seamma válgalávdegoddi go gomihuvvon válggain.

Stivrra mielde sámiid iešmearridanvuoigatvuohta ii velge ollašuva válgalogahallanáššis

Sámedikki čoahkkin álggahii čoahkkimis AHR mearrádusaid analysa.

– Ferte gávnnahit, ahte Sámedikki stivrra oainnu mielde válgalogahallanáššis hálddaša velge boasttuvuohta. Sámiid iešmearridanvuoigatvuohta ii velge ollašuva, ii vel AHR ođđasamos mearrádusaid maŋŋáge, ságajođiheaddji Näkkäläjärvi dadjá.

Ságajođiheaddji Näkkäläjärvi fuomášuhttá, ahte dán áššeollisvuođa dáfus mearkkašahtti AHR jahkegirjemearrádusa AHR 2024:44 birra jienastuvvui jienaiguin 5–2 ja mearrádusas gávnnahuvvui, ahte áššái lea laktásan vuoigatvuođalaš eahpečielggasvuohta.

– Čoavdda velge hálddašeaddji olmmošvuoigatvuođaloavkidemiid čoavdimii lea sámediggelága divvun, nu ahte dat vástida olmmošvuoigatvuođageatnegasvuođaid, mat čatnet Suoma. Dáinna lágiin váttis dili sáhttá čoavdit ja ráfáidahttit, ságajođiheaddji Näkkäläjärvi dadjá.

Sámedikki stivra joatká AHR mearrádusaid analyserema ja mearrida vejolaš joatkkadoaimmain maŋŋelabbos.

AHR mearrádusaid mielde válggaid ođđasit ordnema várás galgá čađahit ođđa evttohasásaheami. Álgomuttu árvalusa mielde evttohasohcamušaid galgá doaimmahit 1.5.2024 rádjai. Ođđasit ordnejuvvon válggat leat 1.–30.6.2024.

Sámediggelága ja AHR mearrádusaid mielde gomihuvvon válggain válljejuvvon Sámedikki lahtut, várrelahtut ja eará doaibmaorgánaid lahtut bissot iežaset doaimmain, dassážiigo ođđasit ordnejuvvon válggaid boađus lea nannejuvvon ja stáhtaráđđi lea bohtosa mielde mearridan sámedikki lahtuid iežaset doaimmaide.

Lassedieđut:

Pirita Näkkäläjärvi
Ságajođiheaddji
044 7533 766
pirita.nakkalajarvi@samediggi.fi

Divvojuvvon 10.4.2024
Divvojuvvon válgalogahallamii merkejuvvot mearriduvvon olbmuid mearrin 65. Alimus hálddahusriekti muitalii árabut, ahte sáhka lea 72 olbmos.