Sääʹmteʹǧǧ älgg valmštõõllâd oʹđđest ââʹnnem vaalid – Halltõs eʹtǩǩad vaal-luʹvddkååʹdd oʹđđest nõõmtummuž ǩieʹssmannu vaali vääras

Sääʹmteeʹǧǧ halltõs ǩiõttʼtõõli såbbrest 27.3.2024 leiʹǧǧ äššan ââʹlmõs vaaldšemvuõiggâz tuʹmmstõõǥǥid, koin KHO mieʹrrii meärkkad 72 oummu Sääʹmteeʹǧǧ eeʹjj 2023 vaal-loǥstõʹǩǩe da oʹđđest ââʹnned sääʹmteʹǧǧvaalid.

Saaǥǥjååʹđteeʹjj Pirita Näkkäläjärvi särnn, što Sääʹmteeʹǧǧ älgg valmštõõllâd oʹđđest ââʹnnem vaalid, kook liâ mieʹrr ââʹnned ǩieʹssmannust 2024.

– Äiʹǧǧ lij siõmmna ja tuâjj lij vaiggâd, ǥu vaali jäʹrjstummuž feʹrttje altteed tâʹlles. Meeʹst lij nåkam vueʹǩǩ, što eeʹjj 2023 vaal jäʹrjstem vaal-luʹvddkååʹdd toiʹmmjempââʹjj puuʹđi eiʹdde loopp 31.12.2023, saaǥǥjååʹđteeʹjj Näkkäläjärvi särnn.

Oouʹdab vaal-luʹvddkådda eʹtǩǩeet juätk

Sääʹmteeʹǧǧ halltõs tuʹmmji, što tõt eʹtǩǩad Sääʹmteeʹǧǧ tiuddsåbbra, što tiuddsååbbar nõõmat eeʹjj 2023 sääʹmteʹǧǧvaalin vaʹsttääm vaal-luʹvddkååʹdd oʹđđest tuâjeez vaali jäʹrjstem diõtt ǩieʹssmannust 2024. Sääʹmteeʹǧǧ puõʹtti tiuddsååbbar jäʹrjstet 12.4.2024.

– Ååskčip miõlstam oʹđđest ââʹnnem vaal mõõnni pââʹjest tåimmam vaal-luʹvddkååʹdd tuâjjan, saaǥǥjååʹđteeʹjj Näkkäläjärvi särnn.

Sääʹmteʹǧǧlääʹjj da KHO tuʹmmstõõǥǥ mieʹldd oʹđđest ââʹnnem vaali tååimtummšest âânn huõl, jõs tõt lij vueiʹtlvaž, seämma vaal-luʹvddkåʹdd ǥu kååʹmtum vaalin.

Halltõõzz mieʹldd säʹmmlai jiõččmieʹrreemvuõiggâdvuõtt ij ni veâl teâuddjõõv vaal-loǥstõkääʹššest

Sääʹmteeʹǧǧ halltõs alttii såbbreʹstes KHO tuʹmmstõõǥǥi analyys.

– Âlgg tuõttâd, što Sääʹmteeʹǧǧ halltõõzz vuäinnmõõžž mieʹldd vaal-loǥstõkääʹššest lij veâl õinn puästvuõtt. Säʹmmlai jiõččmieʹrreemvuõiggâdvuõtt ij ni veâl ooudâs teâuddjõõv, ij-ni še KHO ođđsab tuʹmmstõõǥǥi mâŋŋa, Saaǥǥjååʹđteeʹjj Näkkäläjärvi särnn.

Saaǥǥjååʹđteeʹjj Näkkäläjärvi vuâmmšâtt, što tän äʹššobbvuõđ mieʹldd miârkteei KHO eeʹǩǩ-ǩeʹrjjtuʹmmstõõǥǥâst KHO 2024:44 jiõnsteš jiõnin 5–2 da tuʹmmstõõǥǥâst tuõʹtteš, što äšša lij õhttnam vuõiggâdvuõđlaž pannčiõlggvuõđ.

– Čooud veâl åårrai ooumažvuõiggâdvuõttneuʹrrummši räʹtǩǩummša lij sääʹmteʹǧǧlääʹjj teevvmõš vaʹstteed Lääʹdd čõõnni ooumažvuõiggâdvuõttõõlǥtummšid. Tõn nalla ǩeâškkai vueʹǩǩ vuäǯǯat räʹtǩǩuum da vueʹǩǩ rääuhtum, saaǥǥjååʹđteeʹjj Näkkäläjärvi särnn.

Sääʹmteeʹǧǧ halltõs juätkk KHO tuʹmmstõõǥǥi analysâsttmõõžž da meäʹr vueiʹtlvaž juätkktååimain mâʹŋŋlubust.

KHO tuʹmmstõõǥǥ mieʹldd oʹđđest mieʹrruum vaali diõtt feʹrttai spraavâd ođđ eeʹttǩeeʹji piijjmõš.  Vuâđđeei aʹrvvõõzz mieʹldd eeʹttǩeeʹjjooccmõõžž âʹlǧǧe tååimted 1.5.2024 mõõneeʹst.  Oʹđđest mieʹrruum vaal liâ 1.–30.6.2024.

Sääʹmteʹǧǧlääʹjj da KHO tuʹmmstõõǥǥ mieʹldd kååʹmtum vaalin vaʹlljummšen šõddâm Sääʹmteeʹǧǧ vuäzzla, väärrvuäzzla da jeeʹres tåimmorgaani jeeʹres vuäzzla pâʹšše jiijjâs tuâjain, poka ođđ vaali puäđõs lij raavuum da riikksuåvtõs puäđõõzz meâldlânji mieʹrrääm sääʹmteeʹǧǧ vuäzzlaid tuâjeez.

Lââʹssteâđ:

Pirita Näkkäläjärvi
Saaǥǥjååʹđteeʹjj
044 7533 766
pirita.nakkalajarvi@samediggi.fi