Sämitigge vietij ohtsii lävdikodde- já stivrâpeeivi vuossâmuu tove

Sämitigge čokkij vuossâmuu tove stiivrâ já puoh lävdikuudijd čuákkimistiđ ohtsii čuákkimpiäiván Suáluičiälgán 20.5. Juurdâ lävdikodde- já stivrâpeeivist poođij Sämitige ovdâsteijein ornijdem ääigi.

Čuákkimpeeivi ohjelmist lijjii stiivrâ sehe lävdikuudij čuákkimeh já puohâi ohtsâš savâstâllâmtilálâšvuotâ. Savâstâllâmtilálâšvuođâst savâstâllii äigikyevdilijn aašijn já ráhtádâttii täsivääldi president Alexander Stubb kolliimân Anarist 24.5. Lasseen nuorâirääđi toolâi puohháid hitruus tiätukišto.

Savâstâllâmtilálâšvuođâ maŋa eehid jotkui ohtsii eehidmáállás piällást sehe Ulpu Mattus-Kumpusii já Katri Kittilä anarâškielâlijn konsertpuddáin. Majebaargâ 21.5. uárnejui vala sosiaal- já tiervâsvuođâlävdikode čuákkim.

Lävdikoddepeeivi ääigi lâi uápásmem, viärmáduvâi huksim já savâstâllâm äigikyevdilijn aašijn.

– Ornijdemčuákkim maŋa tile lii lamaš moivášum eereeb iärrás AHR já vuáđulahâváljukode miärádâsâi keežild. Mij lep tiileest, mast kolgâp orniđ sämitiggevaaljâid uđđâsist. Taan tiileest lii lamaš tuođâi tehálâš peessâđ čokkâniđ já lonottiđ jurduid oovtâst, iätá Sämitige saavâjođetteijee Pirita Näkkäläjärvi.

Lävdikodde- já stivrâpeivi lii uási Sämitige jieijâs tooimâ oovdedmist.

– Puátteevuođâst mij viggâp orniđ lävdikodde- já stivrâpeeivi jyehi ive já vijđediđ tom reesuurstile mield tienuuvt, ete meid lävdikuudij värijesâneh já Sämitige pargeeh pyehtih uásálistiđ, iätá Sämitige saavâjođetteijee Pirita Näkkäläjärvi.

Lasetiäđuh:

Pirita Näkkäläjärvi
Sämitige saavâjođetteijee
044 7533 766
pirita.nakkalajarvi@samediggi.fi