Sámedikki oktasaš lávdegodde- ja stivrabeaivi dollojuvvui vuosttas geardde
Sámediggi čohkkii vuosttas háve stivrra ja buot lávdegottiid doallat čoahkkima oktasaš čoahkkinbeaivái Suoločielgái 20.5. Jurdda lávdegodde- ja stivrabeaivvis bođii Sámedikki ovddasteaddjiin ortniiduvvama áigge.
Čoahkkinbeaivve prográmmas ledje stivrra sihke lávdegottiid čoahkkimat ja dasto vel buohkaid oktasaš ságastallandilálašvuohta. Ságastallandilálašvuođas ságastallui áigeguovdilis áššiin ja ráhkkanuvvui dásseválddi presideantta Alexander Stubb Anára galledeapmái 24.5. Dan lassin nuoraidráđđi doalai buohkaide suohtas diehtogilvvu.
Ságastallandilálašvuođa maŋŋá eahket joatkašuvai oktasaš eahketborademiin ja Ulpu Mattus-Kumpunen ja Katri Kittilä anárašgielat konseartabottuin. Disttaga 21.5. lágiduvvui vel sosiála- ja dearvvasvuođalávdegotti čoahkkin.
Lávdegoddebeaivvi áigge oahpásmuvvui, fierpmáiduvvui ja háleštallui áigeguovdilis áššiin.
– Ortniiduvvančoahkkima maŋŋá dilli lea olu rievddadan, man leat dagahan earret eará AHR:a ja vuođđoláhkaváljagotti mearrádusat. Mii leat dál dilis, ahte gártat ordnet Sámedikki válggaid ođđasit. Dán dilis lei duođaige dehálaš beassat čoahkkanit ja gullat earáid oaiviliid, muitala Sámedikki ságajođiheaddji Pirita Näkkäläjärvi.
Lávdegodde- ja stivrabeaivi lea Sámedikki iežas doaimma ovddideami oassi.
– Boahttevuođas mii geahččalit lágidit lávdegodde- ja stivrabeaivve juohke jagi ja viiddidit dan resursadili mielde dakkárin, ahte dat guoská maiddái lávdegottiid várrelahtuid ja Sámedikki buot bargiid, dadjá Sámedikki ságajođiheaddji Pirita Näkkäläjärvi.
Lassedieđut:
Pirita Näkkäläjärvi
Sámedikki ságajođiheaddji
044 753 3766
pirita.nakkalajarvi@samediggi.fi
