Sääʹmteeʹǧǧ õhttsaž luʹvddkåʹdd- da halltõspeeiʹv viõʹttješ vuõssmõs vuâra
Sääʹmteʹǧǧ noori vuõssmõs vuâra halltõõzz da puk luʹvddkooʹddid ââʹnned såbbar õhttsaž sååbbarpeivva Suâlčeâlǥa 20.5. Jurddi luʹvddkåʹdd- da halltõspeeiʹvest šõʹdde Sääʹmteeʹǧǧ eeʹttǩeeʹjin riâššõõttâm poodd.
Sååbbarpeeiʹv prograammâst leʹjje halltõõzz di luʹvddkooʹddi såbbar di puki õhttsaž saǥstõõllâmpodd. Saǥstõõllâmpooddâst juõʹǩǩeš ääiʹjpoddsaž aaʹššid da valmštõʹtteš tääʹssvääʹld presideʹntt Alexander Stubb Aanar-kueʹssreissu 24.5. Lââʹssen nuõrisuåvtõs õõʹni pukid siõrrnallšem teâttǩeâšt.
Saǥstõõllâmpoodd mâŋŋa jeäʹǩǩääž juätkkji õhttsaž jeäʹǩǩesporrmõõžžin di Ulpu Mattus-Kumpunen da Katri Kittilä aanarsääʹmǩiõllsaž konseeʹrtin. Mââibaarǥ 21.5. jäʹrjsteš veâl sosiaal- da tiõrvâsvuõttluʹvddkååʹdd såbbar.
Luʹvddkåʹddpeeiʹv poodd tobdstõʹtteš, säimmõʹtteš da saǥstõʹlleš ääiʹjpoddsaž aaʹššin.
– Riâššõõttâmsåbbar mâŋŋa liâ leämmaž jiânnai turbuleeʹns šõõddeeʹl jeäʹrbi mieʹldd KHO da vuâđđlääʹjjvälljkååʹdd tuʹmmstõõǥǥin. Leäʹp vueʹjjest, koʹst sääʹmteʹǧǧvaal jõõudât oʹđđest ââʹnned. Näkam vueʹjjest leäi tuõđi vääžnai piâssâd noorõõttâd da vaajted jurddjid jooukin, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Luʹvddkåʹdd- da halltõspeiʹvv lij vueʹss Sääʹmteeʹǧǧ jiijjâs tåimmjummuž ooudâsviikkmõõžž.
– Juätkast ǩiččlõõttâp jäʹrjsted luʹvddkåʹdd- da halltõspeeiʹv juõʹǩǩ eeʹjj da veeideed tõn resurssvueʹjj mieʹldd käʹtted še luʹvddkooʹddi väärrniiʹǩǩid da puk Sääʹmteeʹǧǧ tuâjjlaid, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Lââʹssteâđ:
Pirita Näkkäläjärvi
Saaǥǥjååʹđteeʹjj
044 7533 766
pirita.nakkalajarvi@samediggi.fi
