Sämitigge vuárdá iloin Muumileehi-rááiđu tavesämikielâlij oosij almostittem já ráhtádât tuárjuđ ain nuorttâlâš- já anarâškielâlij pyevtitmijd

Pessijái ääigi, 13.4.2020 oovdânpuáhtoo Muumileehi-rááiđu vuossâmuš tavesämikielâlâš uási televisiost tijme 8.25 Yle TV2 -kanavast já Yle Areenast. Suomâ Sämitigge lii lamaš oovtâstpargokyeimin rááiđu sämikielâlij versioi pyevtitmist. Rááiđu lii pyevtittâm Gutsy animations. Sämitige rooli lii sämikielân lohtâseijee äššitubdâm faallâm pyevtitmân. Ohtân ulmen pargoost lii meid lamaš uđđâ sämikielâlij jienâčaittâleijei kavnâm já dubbammáátu nanodem Sämienâmist. Rááiđust almostiteh tääl tavesämikielân 13 uássid, mii lii stuorrâ lasattâs sämikielâlii mediafalâldâhân, paahud Sämitige säämi kielâaašijn västideijee I värisaavâjođetteijee Anni Koivisto.

– Mij Sämitiggeest lep kijttevááh, ete Yle já Gutsy animations valdii háástu vuástá dubbađ rááiđu sämikielân, veikâ lâi tiäđust, ete tot sáttá leđe vátávub já hästee. Mii mielâst tággáár oovtâstpargo puáhtá adeliđ maidnii meid rááiđu pyevtittemfinnodâhân. Mij lep iloliih tast, ete poostijm faallâđ mii torjuu sämikielân lohtâseijee koččâmušâin, mutâ mij oskop meid, ete taat lii vuáđun puáttee dubbamhavváid. Sämitigge tuáivu-uv, ete taat movtijdičij iärásijd västidiđ háástun dubbađ sämikielân.

Kove: Gutsy Animations

Yle já Sämitigge láá soppâm, ete ráiđu pyevtittuvvoo puoh Suomâst sarnum sämikieláid. Vuossâmuuh 13 uássid láá tavesämikielân, já talle 6 uási anarâškielân já 5 nuorttâlâškielân. Tavesämikielâliih uásih almostittojeh kiđđuv 2020 já anarâš- já nuorttâlâškielâ oosij pyevtittem álgá keessiv.

– Mij vyerdip eromâšávt ucceeb sämikieláid pyevtittem oosijd, ko tot lii miinii aaibâs uđđâsijd. Jyehi uđđâ pyevtittem táid kieláid lii uáli jo merhâšittee. Mij tiettip meid ete mon uccáá mediasiskáldâs lii sämikielân já taat jieijâs uásild tuárju kielâi iäláskittempargo.

Sämikielâi uhkevuálásii tile tiet Sämitigge lii ráhtám kielâpoolitlii linjim, mii kuáská Muumileehi-rááiđu kielân. Linjimân puáhtá uápásmuđ tääbbin.

Lasetiäđuh:

Anni Koivisto
I värisaavâjođetteijee
anni.koivisto@samediggi.fi / +358 40 415 5969

Anne Kirste Aikio
kielâtorvočällee
anne-kirste.aikio@samediggi.fi / 010 839 3124 | +358 40 707 5626

Tarja Porsanger
vuávájeijee / Elleekovekuávdáš Skábma
tarja.porsanger@samediggi.fi / 010 839 3182 |  +348 50 569 6065