Sämitiigán ij juovlâskeŋkkâruttâ taan ive
Ovdâskodde tuhhit puáttee ive lopâlii budjet juovlâmáánust. Kove: Hanne Salonen / Ovdâskodde
Staatâruttâváljukodde raahtij 11.12. loopân jieijâs smiettâmuš (VaVM 25/2025), mii kuáská puáttee ive staatâ budjetân. Smiettâmuš ana sistees iävtuttâs 50 miljovn euro lasemeriruuđâst, nk. juovlâskeŋkkâruuđâst, mii čujottuvvoo aalmugovdâsteijei iävtuttem eromâš havváid. Ovdâskodde tuhhit puáttee ive lopâlii budjet juovlâmáánust.
Sämitigge lâi iävtuttâm juovlâskeŋkkâruuđâ sämipárnái já -nuorâi kielâpirrâs naanoodmân, mutâ taan tove ruttâdem ij mieđettum Sämitige iävtuttem tooimân. Sämitigge lâi pivdám ovdâskode staatâruttâváljukoddeest, ete ovdâskodde čujottičij ihán 2025 nuuvt ettum juovlâskeŋkkâruuđâst 100 000 eurod sämipárnái já -nuorâi kielâpirrâs já siärvuslâšvuođâ oovdedmân. Tain ruuđáin liččii luávdám iärásij juávhust säminuorâi taaiđâtábáhtus koloid.
Sämitige saavâjođetteijee Pirita Näkkäläjärvi ana miärádâs vaidâlittee äššin.
– Mij ilodep eromâšávt Ucjuv kieldâ Luosâkuávdáá finnim 125 000 euro juovlâskeŋkkâruuđâst, mutâ tot lii šaali, ete säminuorâi taaiđâtábáhtus ij finnim torjuu. Taat lâi nubbe ive maŋaluvâi, ko mij uusâim puátusijttáá juovlâskeŋkkâruuđâ taan sämipárnái já -nuorâi stuárráámuu jyehi-ivvááš tábáhtusân, saavâjođetteijee Näkkäläjärvi iätá.
Säminuorâi taaiđâtábáhtus ruttâdem ij tááláá tääsist pijssáá tábáhtus puoh orniistâllâmkoloid. Sämitigge lii puáhtám ääši oovdân sierâ teivâdmijn já tuáivum staatârääđi kuávlust laseruttâdem tábáhtusân. Sämipárnááh pajedii párnáá vuoigâdvuođâi čuákkimist oovdân huolâ säminuorâi taaiđâtábáhtusâst.
Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
