Sámediggái ii boahtán juovlaskeaŋkaruhta dán jagi 

Ruhtaváljagoddi gárvii 11.12. smiehttamuša (VaVM 25/2025) boahtte jagi stáhta bušeahtas.  Smiehttamuš sisttisdoallá evttohusa 50 miljovnna euro lassimearreruđas ng. juovlaskeaŋkaruđas, man riikkabeaiáirasat sáhttet evttohit sidjiide dehálaš fitnuide. Riikkabeaivvit dohkkehit loahpalaš boahtte jagi bušeahta juovlamánus. 

Sámediggi lei evttohan juovlaskeaŋkaruđa sámemánáid- ja nuoraid giellabirrasa nannemii, muhto dán háve ruhtadeapmi ii juolluduvvon Sámedikki evttohan doibmii. Sámediggi lei bivdán riikkabeivviid ruhtaváljagottis, ahte riikkabeaivvit čujuhivčče jahkái 2025 ng. juovlaskeaŋkaruđas 100 000 euro sámemánáid ja nuoraid giellabirrasa ja searvvušlašvuođa ovddideapmái. Dainna ruđain lei ulbmil gokčat earret eará sámenuoraid dáiddadáhpáhusa goluid. 

Sámedikki ságadoalli Pirita Näkkäläjärvi mielas mearrádus lea šállošahtti. 

– Mii illudit earenoamážit ahte Ohcejoga Luossaguovddážii juolluduvvui 125 000 euro juovlaskeaŋkaruhta, muhto lei šállošahtti ahte sámenuoraid dáiddadáhpáhusa eai dorjon. Dát lei juo nubbi jahki go ozaimet bohtosiid haga juovlaskeaŋkaruđa dán sámemánáid ja -nuoraid deháleamos jahkásaš dáhpáhussii, ságadoalli Näkkäläjärvi dadjá. 

Sámenuoraid dáiddadáhpáhusa ruhtadeapmi ii dalá dilis doarvái gokčat buot daid goluid mat bohtet dáhpáhusa lágideamis. Sámediggi lea buktán ášši ovdan iešguđetge dáhpáhusain ja sávvan lassiruhtadeami dáhpáhussii. Sámemánát loktejedje mánáid vuoigatvuođaid deaivvadeamis fuola sámenuoraid dáiddadáhpáhusas. 

Lassidieđut:

Pirita Näkkäläjärvi
Sátnejođiheaddji
044 753 3766
pirita.nakkalajarvi@samediggi.fi