Sämmilij sosiaal- já tiervâsvuođâpalvâlusâi ovdedem ij luhostuvá tuárvi já pisovâš resursijttáá

Sosiaalsyergi mättimkuávdái väldikodáliih čuoppâmeh hiäjusmiteh Poske sämiohtâduv sämikielâlij já kulttuurmiäldásij sosiaal- já tiervâsvuođâpalvâlusâi ovdedem. Sámi Poske tuáimá Tave-Suomâ mättimkuávdáá (Poske) já Laapi pyereestvaijeemkuávlu (Lapha) sopâmuškyeimin, mutâ haaldâtlávt ohtâdâh lii Sämitige soti-sektor ooleest.

Sámi Poske väldikodálâš eromâšpargon (1411/2001) lii sämmilij sosiaal- já tiervâsvuođâpalvâlusâi väldikodálâš ovdedem sehe toos lohtâseijee tutkâm-, škovlim- já árvuštâllâmtoimâ. Lasanâm tárbu sämikielâláid sosiaal- já tiervâsvuođâpalvâlussáid uáinoo eereeb iärrás elilâm ulmui palvâlusâi táárbu lassaanmin sehe aktiivlii kielâiäláskittempargo mield pärniperrui palvâlusâi lasaneijee tárbun. Sämmilij sosiaal- já tiervâsvuođâpalvâlusâi ovdedem ij luhostuvá resursijttáá.

Staatâvarijministeriö ive 2025 budjetiävtuttâs mield Poske sämiohtâduv resursijd čyeppih vala ovdiist. STM valmâštâl nubástusâid sosiaalsyergi mättimkuávdáštooimâ lahâvuáđun já pisováid čuoppâmijd mättimkuávdáá ruttâdmân já mättimkuávdái miärán. Taah iävtuttum nubástusah vaigutteh merhâšitteht Tave-Suomâ mättimkuávdáá sämiohtâduv (Sámi Poske) tooimân. Ohtâduv tooimâ resursijd láá čuoppâm jo tolebáá-uv maŋgâ ive, kuás táálááh resurseh láá aaibâs liijkás uceh táárbu háárán.

Ive 2025 aalgâst sosiaalsyergi mättimkuávdáid mäksimnáál staatâtorjuu meeri ličij ohtsis 1 250 000 eurod já sosiaalsyergi mättimkuávdái staatâtorjuu meeri kiäppáničij masa piälán ovdebáást. Vuávájum čuoppâmij mield Poske sämiohtâduv 1,5 % staatâtorjust uáivildičij 18 000 euro torjuu ihán 2025, kuás ij innig pastaččii pálkkááttiđ pisováá pargee. Staatâtorjui vuávájum čuoppâmij já torjuu miärášumeaagâi vuáđuld Poske sämiohtâduv toimâ já toimâhináh keevâtlávt jaskeh.

Sämitige mield vuávájum staatâtoorjâmeerijn Poske sämiohtâduv toimâ já toimâhináh sämmilâšaalmug palvâlemtáárbui huámmášumán väldim várás já sämikielâlij já kulttuurmiäldásij palvâlusâi ovdedem várás kuulmâ sämikielân hiäjusmuveh ollásávt. Tai staatâ toimâiguin sämikielâlâš aalmug lii karttâmin eresárvusâš sajattâhân suomâkielâlii väldiaalmug háárán. Vuávájum nubástusâin já čuoppâmijn láá eromâš merhâšittee já vijđáht ulâtteijee vaikuttâsah sämmilij jiešmeridemvuoigâdvuotân já vuáđulavâlij kielâlij já kulttuurlij vuoigâdvuođâi olášumán sosiaal- já tiervâsvuođâpalvâlusâin.

Sämitiigán kalga turviđ uđâsmitmij ooleest sehe toi maŋa tuárvi resursijd já sajattuv sämiaalmug palvâlemtáárbui huámmášumán väldimân väldikodálii eromâšpargo mield. Tááláš 1,5 % toorjâ ij lah tuárvi já Sämitigge iävtut sirdâšum fastâ vittádum resursân. Taat tovâččij máhđulâžžân oovtâ olesáigásii pargee pálkkááttem já sämiaalmugân uáivildum ovdedemtooimân tuođâlijd já oovtviärdásijd toimâmresursijd eres mättimkuávdái háárán.

Lasetiäđuh:

Tuomas Aslak Juuso
II värisaavâjođetteijee
040 687 3394 / 010 839 3101
tuomas.juuso@samediggi.fi

Darija Semenoja
Poske sämiohtâduv vuávájeijee
darija.semenoja@samediggi.fi