Sámiid sosiála- ja dearvvasvuođabálvalusaid ovddideapmi ii ollašuva almmá gokčevaš ja fásta resurssaid haga

Sosiálasuorggi máhttinguovddážiid riikkadási čuohppamat hedjonahttet Poske sámeovttadaga sámegielat ja kulturmieldásaš sosiála- ja dearvvasvuođabálvalusaid ovddideami. Sámi Poske doaibmá Davvi-Suoma máhttinguovddáža (Poske) ja Lappi buresveadjinguovllu (Lapha) soahpamušguoibmin, muhto hálddahusa dáfus ovttadat gullá Sámedikki sode-sektora oktavuhtii.

Sámi Poske riikkaviidosaš spesiálabargun (1411/2001) lea sámiid sosiála- ja dearvvasvuođabálvalusaid riikkaviidosaš ovddideapmi ja dasa laktáseaddji dutkan-, skuvlen- ja árvvoštallandoaibma. Lassánan dárbu sámegielat sosiála- ja dearvvasvuođabálvalusaide oidno earret eará ahkeolbmuid bálvalusaid dárbbu lassáneapmin ja maiddái aktiivvalaš gielaealáskahttinbarggu dihte mánnábearrašiid bálvalusaid lassáneaddji dárbun. Sámiid sosiála- ja dearvvasvuođabálvalusaid ovddideapmi ii ollašuva almmá resurssaid haga.

Ruhtaministeriija jagi 2025 bušeahttaevttohusa mielde Poske sámeovttadaga resurssat bohtet geahppánit ain ovddežis. SDM válmmaštallá nuppástusaid sosiálasuorggi máhttinguovddášdoaimma láhkavuđđui ja bissovaš čuohppamiid máhttinguovddážiid ruhtadeapmái ja máhttinguovddážiid mearrái. Dát evttohuvvon nuppástusat váikkuhit mearkkašahtti láhkai Davvi-Suoma máhttinguovddáža sámeovttadaga (Sámi Poske) doibmii. Ovttadaga doaimma resurssat leat čuhppojuvvon juo máŋgga jagi áigge ovdalge, nu ahte dálá resurssat eai duođaige reahke dárbbu ektui.

Jagi 2025 álggu rájes stáhtadoarjaga mearri livčče oktiibuot 1 250 000 euro sosiálasuorggi máhttinguovddážiidda ja sosiálasuorggi máhttinguovddážiid stáhtadoarjaga mearri geahppánivčče measta beallái ovddibu ektui. Plánejuvvon čuohppamiid vuođul Poske sámeovttadaga 1,5 % stáhtadoarjagis dárkkuhivčče 18 000 euro doarjaga jahkái 2025, mainna ii sáhtášii šat bálkáhit bissovaš bargi. Plánejuvvon stáhtadoarjaga čuohppamiid ja doarjaga mearrašuvvanvuođustusa geažil Poske sámeovttadaga doaibma ja doaibmaneavttut geavadis nohket.

Sámedikki mielas plánejuvvon stáhtadoarjjameriin Poske sámeovttadaga doaibma ja doaibmaneavttut sámiid bálvalandárbbuid vuhtiiváldima várás ja sámegielat ja kulturmieldásaš bálvalusaid ovddideami várás golmma sámegillii hedjonit ollásit. Dáid stáhta doaimmaid bokte sámegielat olbmot leat gártamin heajut sajádahkii suomagielat váldoálbmoga ektui. Plánejuvvon nuppástusain ja čuohppamiin leat hui mearkkašahtti ja guhkálaš váikkuhusat sámiid iešmearridanvuoigatvuhtii ja vuođđolága mieldásaš gielalaš ja kultuvrralaš vuoigatvuođaid ollašuvvamii sosiála- ja dearvvasvuođabálvalusain.

Sámediggái galgá sihkkarastit ođastusaid oktavuođas sihke daid maŋŋá doarvái resurssaid ja sajádaga sámiid bálvalandárbbuid vuhtiiváldima várás riikkaviidosaš spesiálabarggu mielde. Dálá 1,5 % doarjja ii leat doarvái ja Sámediggi evttoha, ahte sirdásuvvo dihto bealljemerkejuvvon resursii. Dat dagašii vejolažžan ollesáigásaš bargi bálkáheami ja sámeálbmogii čujuhuvvon ovddidandoibmii duođalaš ja ovttaveardásaš doaibmanresurssaid eará máhttinguovddážiid ektui.

Lassidieđut:

Tuomas Aslak Juuso
II várresátnejođiheaddji
040 687 3394%010 839 3101
tuomas.juuso@samediggi.fi

Darija Semenoja
Poske sámeovttadaga plánejeaddji
darija.semenoja@samediggi.fi