Spiekâstâhive tovâttem vahâgijd puásuituálun kalga sajanmäksiđ
Sämitigge kiäsá staatârääđi jesânáid, vâi čujottiččii vahâgij sajanmááksun vuoigâlii já tuárvi stuorrâ meriruuđâ. Meriruuđâ kalgeh čujottiđ toid kuávloid já puásuiulmuid, kiäh láá eromâšávt killám vahâgijd iivij 2019-2020 spiekâstâhlii šoŋŋâ-, muotâ- já luándutile keežild. Staatârääđi kieđâvuš ääši almosčuákkimistis tuorâstuv 27.5.2021.
Haldâttâs lii sooppâm 25.5.2021 ive 2021 kuálmád lasebudjetist. Täälvi 2019-2020 muotâtile tovâttem puásuivahâgij sajanmááksun värideh 6 miljovn eurod. Summe vuáđuduvá eennâm- já meccituáluminister iävtuttâsân.
– Mun lam huolâstum puásuiulmui tiileest, tastko puásuituálu lii killám vijđes vahâgijd spiekâstâhlij tiilij tiet. Lii tehálâš, ete puásuivaahâglaavâ heiviitteh tääl vuossâmuu tove puásuituálu puátteevuođâ turviimân, iätá Sämitige saavâjođetteijee Tuomas Aslak Juuso.
Sämitigge kiäsá ministeráid, ete tarkkuuččii vala staatârääđi almosčuákkimist sajanmávssoid čujottemnáál meriruuđâ. – Lii epikuáhtulâš, ete jiešvástádâsuásih láá päcimin návt styeresin, veikâ laavâ tárguttâssân lii išediđ puásuituálu tuáimeid cevziđ vijđes já vyerdimettum vahâgijn já turviđ iäláttâs jotkum, juátká II värisaavâjođetteijee Leo Aikio.
Täälvi 2019-2020 tovâttem vahâgijd puáhtá anneeđ puásuituálu uáinust tagarin, ete iä lah ovdil tiettum. Vahâgeh láá tiettum eennâmtieđâlávt vijđes kuávlust já toid kuleh eereeb iärrás poccui jämimeh, lasepiemmâmkoloh sehe njuovvâmpoccui meeri koččâm. Palgâsij ovtâstus toohâm rekinistem mield puásuituálun šoddâm táápuh láá 23 miljovn eurod já vahâgij vaikuttâs juáhás neelji ive áigádâhân.
– Lii tehálâš, ete sajanmáksu čujottuvvoo tienuuvt, ete tot tuođâi iššeed enâmustáá killám kuávluid já puásuiulmuid. Mij lep iäljárávt porgâm taan ääši oovdân já meriruttâ lii-uv aledum kuttâ miljovn euron. Summe ij kuittâg vala lah tuárvi sajanmäksiđ täälvi tovâttem vahâgijd puásuituálun, iätá Aikio.
Puásuivaahâglaavâ 1 § mield laavâ tárguttâssân lii išediđ puásuituálu tuáimeid cevziđ vijđes já vyerdimettum puásuituálun čuáccám vahâgijn. Puásuivaahâglaavâ ovdâpargoi mield lavváin lii tárguttâs toohâđ máhđulâžžân monâttâllâm, moin puávtáččij jotelávt katastrof maŋa väldiđ anon sajanmäksimsysteem, moin puávtáččij turviđ iäláttuv jotkum.
- Sämitige aannum staatârááđán (25.5.2021)
- Sämitigge keesij cuáŋuimáánust 2021 ovdâskoddepiäláduvváid puásuitáápui vuoigâlii sajanmäksimân já puásui-iäláttâs juátkim turviimân
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
Leo Aikio
II värisaavâjođetteijee
040 621 6505
leo.aikio@samediggi.fi
Sarita Kämäräinen
Má. lahâčällee
040 186 7258
sarita.kamarainen@samediggi.fi
Kove: Tarja Länsman
