STM pajedij puásuituállei sajasâšišetiijmij ive 2024 enâmusmere 200 tiijmán
Sosiaal- já tiervâsvuođâministeriö lii nonnim puásuituálleid sajanmäksimnáál sajasâšišetiijmij enâmusmeerrin 200 sajasâšišetijmed puásuituállee kuáttá ive 2024. STM adelij asâttâs 16.9.2024.
– Ovdâlist sajasâšiše enâmustijmemeerrin ihán 2024 asâttii sosiaal- já tiervâsvuođâministeriö asâttâssáin 130 tijmed puásuituállee kuáttá. Talle kuittâg pahudii, ete asâttâs puávtáččii maŋeláá mutteđ já sajasâšišetiijmij enâmusmere pajediđ, jis sajasâšiševuáháduv meriruttâtiileest tábáhtuččii nubástusah ive 2024 ääigi. Návt lii tastoo tábáhtum, muštâluvvoo STM tiäđáttâsâst.
Asâttâs lii puáttám vuáimán 1.10.2024 já lii vyeimist 31.12.2024 räi.
Lasetiäđuid ucâmušmonâttâlmist finnee Eennâmtuáluirâtteijei iäláttâhlájádâsâst. Eennâmtuáluirâtteijei iäláttâhlájádâs Mela
Sämitigge lii iävtuttâm sajasâšišetiijmij mere pajedem tááláá táárbu västideijee táásán
Sämitigge vuolgâttij kuovâmáánust ávus reeivâ ovdâskoddejuávhui já piäláduvâi saavâjođetteijeid ja iävtuttij sajasâšišetiijmij mere pajedem kelijdeijee táásán, ucemustáá 300 tiijmán ivveest.
Sämitigge puovtij reeivâst, mutâ meid ministerteivâdmist vyesimáánust 2024 Sanni Grahn-Laasosijnoovdân meid tom, ete tááláš puásuituállei sajasâšišelahâasâttem hiäjusmit suhâpeelij koskâsii täsiáárvu olášume já puásuituállei pargopyereestvaijeem ovdedem. Sajasâšiše lii ohtâ tehálâš pargoniävvu, moin puáhtá tuárjuđ puásuituállee fyysilii já psyykkilii vaijeem, tiervâsvuođâ sehe toimâmnaavcâ lusis pargoost.
– Puásuituállei tááláá sajasâšiševuáháduv kolgâččii ovdediđ tienuuvt, ete tot ovdedičij oovtviärdásâšvuođâ já västidičij tuođâlii táárbun. Puásuituállei puácuvuođâ já paartij várás kevttimnáál orroo sajasâšišetiijmij mere kolgâččii pajediđ ucemustáá 300 tiijmán ivveest, iätá Sämitige I värisaavâjođetteijee Leo Aikio.
Sämitigge haalijd tieđettiđ lasetiijmijn, vâi taid puáhtá kevttiđ vala huápulii pygályspaje ääigi.
Lasetiäđuh:
Leo Aikio
I värisaavâjođetteijee
040 621 6505
leo.aikio@samediggi.fi
