SDM bajidii boazodoalliid sadjásašveahkkediimmuid jagi 2024 eanemusmeari 200 diibmui
Sosiála- ja dearvvašvuođaministeriija lea nannen boazodoalliid buhttenvuloš sadjásašveahkkediimmuid eanemus mearrin 200 sadjásašveahkkediimmu boazodoalli ektui jagi 2024. SDM attii ásahusa 16.9.2024.
– Árabut sadjásašveahki eanemusdiibmomearrin jahkái 2024 ásahuvvui sosiála- ja dearvvašvuođaministeriija ásahusain 130 diimmu boazodoalli ektui. Dalle goittotge gávnnahuvvui, ahte ásahusa sáhtášii maŋŋá rievdadit ja sadjásašveahkkediimmuid eanemusmeari bajidit, jos sadjásašveahkkevuogádaga mearreruhtadilis dáhpáhuvašedje nuppástusat jagi 2024 áigge. Ná lea dasto dáhpáhuvvan, muitaluvvo SDM:a dieđáhusas.
Ásahus lea boahtán fápmui 1.10.2024 ja lea fámus 31.12.2024 rádjai.
Lassedieđuid ohcama birra oažžu Eanadoalliid ealáhatlágádusas: Eanadoalliid ealáhatlágádus Mela
Sámediggi lea evttohan sadjásašveahkkediimmuid meari bajideami dálá dárbbu vástideaddji dássái
Sámediggi doarjalii guovvamánus rabas reivviin riikkabeaijoavkkuid ja bellodagaid ságajođiheaddjiide, vai boazodoalliid sadjásašveahkkediimmuid mearri lasihuvvo doarvái buorre dássái, uhcimustá 300 diibmui jagis.
Sámediggi ovdanbuvttii reivves, muhto maiddái ministtardeaivvadeamis miessemánus 2024 Sanni Grahn-Laasosiindan, ahte boazodoalliid dálá sadjásašveahkkeláhkaásaheapmi hedjonahttá sohkabeliid gaskasaš dásseárvvu ollašuvvama ja boazodoalliid buresveadjima ovddideami. Sadjásašveahkki lea okta dehálaš bargoreaidu, mainna sáhttá doarjut boazodoalliid fysalaš ja psyhkalaš veadjima, dearvvašvuođa ja doaibmanavccaid garra barggus.
– Boazodoalliid dálá sadjásašveahkkevuogádaga galggašii ovddidit nu, ahte dat ovddidivčče ovttaveardásašvuođa ja vástidivčče duođalaš dárbui. Boazodoalliid buohcuvuođaid ja bárttiid várás várrejuvvon sadjásašveahkkediimmuid meari galggašii lasihit uhcimustá 300 diibmui jagis, dadjá Sámedikki I várresátnejođiheaddji Leo Aikio.
Sámediggi háliida dieđihit lassidiimmuin, vai daid lea vejolaš geavahit vel dál hohpolaš bigálusaid áigge.
Lassidieđut:
Leo Aikio
I várresátnejođiheaddji
040 621 6505
leo.aikio@samediggi.fi
