Suáđigil kieldâ já Sämitige ovdâsteijeeh teivâdii oovtâstpargo ooleest
Suáđigil kieldâ já Sämitige ovdâsteijeeh teivâdii oovtâstpargo pyeredem ooleest. Teivâdmist, mii uárnejui Anarist 3.5.2024, kieđâvuššii Suáđigil kieldâ já Sämitige ohtsijd, tehálijd já äigikyevdilijd aašijd.
Suáđigil kieldâ já Sämitigge teivâdáin oovtâstpargočuákkimist Anarist. Kove: Sämitigge
Aanaar kieldâ já Sämitige ovdâsteijeeh teivâdii Anarist Säämi kulttuurkuávdáš Saijoosist vástuppeeivi 3.5.2024. Teivâdem mittomeerrin lâi ovdediđ ohtsii hiäđukocceem já oovtâstpargo. Oovtâstpargo já ohtsii hiäđukocceem ääših lijjii ovdâmerkkân Vuáču sämisiärváduv uásálâšvuođâ pyeredem, oovtviärdásâšvuođâ ovdedem sehe kielâpiervâlruttâdem pajedem já juátkim.
Čuákkimist kieđâvuššii meid eres aašijd, moh láá äigikyevdileh Suáđigil kieldân já Sämitiigán. Oovtâst savâstâllii eereeb iärrás sämmilij vuoigâdvuođâin, iäláttâsâi já eennâmkevttim oohtânheiviitmist sehe kieldâässei šiev koskâvuođâin kieldâst. Ohtsijd teivâdmijd já oovtâstpargo lii tárguttâs juátkiđ. Ovdâmerkkân sämikielân já sämikielâlii máttááttâsân lohtâseijee ääših kieđâvuššojeh tärhibeht sierâ oovtâstpargočuákkimist.
Suáđigil taveuási ađai Vuáču já Laapi palgâs kuávlu lii sämmilij päikkikuávlu tehálâš uási, iätá Sämitige saavâjođetteijee Pirita Näkkäläjärvi.
– Lii tehálâš tubdâstiđ sämikuávlu robdâuásist orroo Vuáču kuávlu sierânâsjiešvuođâid. Mist lii oovtâst stuorrâ ovdâsvástádâs tuárjuđ sämikielâ, -kulttuur já ärbivuáválij iäláttâsâi eellimvuáimálâšvuođâ Vuáču kuávlust, iätá saavâjođetteijee Pirita Näkkäläjärvi.
– Kieldâ já Sämitige jyehi-ivvááš teivâdmij iäláskittem lii mii oovtâstpargo tehálâš uási. Tuđâvâžžân mun huámmášim, ete mij puovtijm jo ovdil mii pargočuákkim toohâđ sämikuávlu kieldâiguin ja Sämitiggijn ohtsii uáivil rävisolmoošškovlimtorjust. Mun tuáivum, ete mij kavnâp puátteevuođâst-uv ohtsijd uáivilijd hiäđukocceemaašijn, muštâl Suáđigil kieldâhovdâ Jari Rantapelkonen.
Čuákkimân uásálistii Suáđigil kieldâst kieldâhovdâ Jari Rantapelkonen, kieldâstiivrâ saavâjođetteijee Tuula Annala, ovdedemhovdâ Ari Pesonen, teknisâš hovdâ Matias Yliriesto, pyereestvaijeem- já ovdedemhovdâ Antti Palomaa já iäláttâskoordinaattor Senja Lakela-Pyykkönen. Sämitiggeest čuákkimân uásálistii saavâjođetteijee Pirita Näkkäläjärvi, I värisaavâjođetteijee Leo Aikio, haldâttâhhovdâ Pia Ruotsala-Kangasniemi, Sämitige jeessân Armi Palonoja Vuáčust, saavâjođetteijee išedeijee Niina Siivikko sehe sierâ toimâsuorgij virgeulmuin kielâtorvočällee Anne Kirste Aikio, iäláttâs- já pirâslahâčällee Sarita Kämäräinen, kielâpiervâlstivrejeijee Niina Aikio-Siltala, vs. iäláttâsčällee Maria Valkeapää, vs. pirâsčällee Tiina Lovisa Solbär já sämimađhâšem kuállejeijeestivrimhaavâ vuávájeijee Kirsi Suomi.
Sämitige já Suáđigil kieldâ oovtâstpargoteivâdem lii uási jyehi-ivvááš kieldâoovtâstpargoteivâdmijn. Moonnâm valjâpaajeest lâi västideijee teivâdem Aanaar kieldáin. Oovtâstpargoteivâdmeh Ucjuv já Iänuduv kieldâiguin láá valmâštâllâmnáál já toh uárnejuvvojeh čohčuv.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
Jari Rantapelkonen
Suáđigil kieldâhovdâ
040 615 9880
jari.rantapelkonen@sodankyla.fi
