Soađegili gieldda ja Sámedikki ovddasteaddjit deaivvadedje ovttasbargočoahkkimis

Soađegili gieldda ja Sámedikki ovddasteaddjit deaivvadedje Anáris Sámekulturguovddáš Sadjosis bearjadaga 3.5.2024. Deaivvadeami ulbmilin lei ovddidit oktasaš ovdogohcima ja ovttasbarggu. Ovttasbarggu ja oktasaš ovdduid gohcima fáddán fuomášuvvojedje ovdamearkka dihte Vuohču sámeservoša oassálastinvejolašvuođaid buorideapmi, ovttaveardásašvuođa ovddideapmi ja giellabeasseruhtadeami lasiheapmi ja joatkašuvvama sihkkarastin.

Čoahkkimis gieđahallojedje maiddái eará Soađegili gildii ja Sámediggái áigeguovdilis áššit. Ovddasteaddjit ságastalle earret eará sápmelaččaid vuoigatvuođaid, ealáhusaid ja eanangeavaheami heiveheami ja maid buriid veahkadatgaskavuođaid birra. Áigumuššan lea joatkit oktasaš deaivvademiid ja ovttasbarggu. Ovdamearkka dihte sámegiela ja sámegielat oahpahusa áššit gieđahallojit dárkileappot sierra ovttasbargočoahkkimis.

Soađegili davveoassi dahjege Vuohčču ja Lappi bálgosa guovlu leat dehálaš guovllut sámiid ruovttuguovllus, muitala Sámedikki sátnejođiheaddji Pirita Näkkäläjärvi.

–  Lea dehálaš fuomášit sámiid ravdaguvlui gullevaš Vuohču erenomášsárgosiid. Mis lea ovttas stuorra ovddasvástádus doarjut sámegiela, kultuvrra ja árbevirolaš ealáhusaid eallinfámu Vuohču guovllus, dadjá sátnejođiheaddji Pirita Näkkäläjärvi.

–  Gieldda ja Sámedikki jahkásaš deaivvademiid ealáskahttin lea min ovttasbarggus dehálaš bealli. Duđavažžan mun gávnnahin, ahte mii basttiimet čállit juo ovdal min deaivvadeami sámiid ruovttuguovllu gielddaid ja Sámedikki oktasaš cealkámuša rávesolbmuiddoarjaga bealis. Mun sávan, ahte mii juogadit boahtteáiggisnai oktasaš oainnuid fáttáin, maid ovdduid mii galgat gohcit, muitala Soađegili gielddahoavda Jari Rantapelkonen.

Čoahkkimii oassálaste Soađegili gieldda ovddasteaddjin gielddahoavda Jari Rantapelkonen, gielddaráđđehusa sátnejođiheaddji Tuula Annala, ovddidanhoavda Ari Pesonen, teknihkalaš hoavda Matias Yliriesto, buresveadjin- ja ovddidanhoavda Antti Palomaa ja ealáhuskoordináhtor Senja Lakela-Pyykkönen. Sámedikki ovddasteaddjin čoahkkimii oassálaste sátnejođiheaddji Pirita Näkkäläjärvi, I várresátnejođiheaddji Leo Aikio, hálddahushoavda Pia Ruotsala-Kangasniemi, sámedikki lahttu Armi Palonoja Vuohčus, sátnejođiheaddji veahkki Niina Siivikko ja lassin iešguđet doaibmasuorggi bargiin gielladorvočálli Anne Kirste Aikio, ealáhus- ja birasláhkačálli Sarita Kämäräinen, giellabeassejođiheaddji Niina Aikio-Siltala, vs. ealáhusčálli Maria Valkeapää, vs. birasčálli Tiina Lovisa Solbär ja sámeturismma galledeaddjiid rávvenprošeavtta plánejeaddji Kirsi Suomi.

Sámedikki ja Soađegili gieldda ovttasbargodeaivvadeapmi gullá jahkásaš gieldaovttasbargodeaivvademiide. Mannan válgabaji áigge ordnejuvvui seammalágan deaivvadeapmi Anára gielddain. Ovttasbargodeaivvademiid Ohcejoga ja Eanodaga gielddaiguin leat válmmaštallame, ja dat ordnejuvvojit čakčat.

Lassedieđut:

Pirita Näkkäläjärvi
Sámedikki sátnejođiheaddji
044 753 3766
pirita.nakkalajarvi@samediggi.fi

Jari Rantapelkonen
Soađegili gielddahoavda
040 615 9880
jari.rantapelkonen@sodankyla.fi