Suäʹđjel kååʹdd da Sääʹmteeʹǧǧ eeʹttkõʹstti kaaunõʹtte õhttsažtuâj diõtt

Suäʹđjel da Sääʹmteeʹǧǧ eeʹttkõʹstti kaaunõʹtte Aanrest sääʹmkulttuurkõõskõs Sajoozzâst piâtnâc 3.5.2024. Kaaunõõttmõõžž jurddjen leäi õhttsaž õuddõsǩiõččmõõžž di õhttsažtuâj ooudâsviikkmõš. Õhttsažtuâj da õhttsaž õuddõsǩiõččmõõžž äʹššen tobdsteš õuddmiârkkân Vuâčč sääʹmõutstõõzz vuässadvuõđ pueʹrummuž, õõutverddsažvuõđ õõudummuž di ǩiõllpieʹssteäggtõõzz kaggmõš da juätkkjummuš.

Såbbrest mõʹnneš čõõđ še kådda da Sääʹmtegga ääiʹjpoddsaž jeeʹres aaʹššid. Õõutsââʹjest saǥstõʹlleš jeeʹrab mieʹldd säʹmmlai vuõiggâdvuõđi pirr, jieʹllemvuõʹjji da mäddââʹnnem õʹhttesuåvtummšest di šiõǥǥ jälsteeijoukk-kõskkvuõđin kååʹddest. Õhttsaž kaaunõõttmõõžžid da õhttsažtuâj lij mieʹrr juäʹtǩǩed. Õuddmiârkkân sääʹmǩiõl da sääʹmǩiõllsaž mättʼtõʹsse kuulli aaʹššid ǩiõttʼtõõlât tääʹrǩben jeeʹrab õhttsažtuâjjsåbbrest.

Suäʹđjel tâʹvv-vueʹzz leʹbe Vuâčč da Lappi palggâz vuʹvdd lie kaallšõs vueʹss säʹmmlai dommvuuʹdest, särnn Sääʹmteeʹǧǧ saaǥǥjååʹđteei Pirita Näkkäläjärvi.

–  Miârkteei lij tobdsted sääʹmvuuʹd ruõbdâst åårrai Vuâčč vuuʹd jiiʹjjesnallšemvuõđid. Mij vaʹstteemnalla lij õõutveäkka tuärjjeed sääʹmǩiõl, kulttuur da äʹrbbvuõđlaž jieʹllemvuõʹjji jieʹllemviõǥǥ Vuâčč vuuʹdest, särnn saaǥǥjååʹđteei Pirita Näkkäläjärvi.

–  Kååʹdd da Sääʹmteeʹǧǧ eeǥǥlaž kaaunõõttmõõžži jeälltummuš lij vueʹssen mij õhttsažtuâjast. Toođviʹžžen vuâmmšem, što põõʹstim raajjâd õhttsaž peäʹlvälddmõõžž kuõskeeʹl vuõrâsoummiškooultemtuärjjõõzz juʹn õuʹddel mij sääʹmvuuʹd kooʹddi ja Sääʹmteeʹǧǧ kõskksaž tuâjjpalaveeʹr. Tuäivam, što kaunnâp še juätkast õhttsaž pieʹllväʹlddmid õuddõsǩiõččâmaaʹššin, särnn Suäʹđjel kåʹddjååʹđteei Jari Rantapelkonen.

Såbbra vuässõʹtte Suäʹđjel kååʹddest kåʹddjååʹđteei Jari Rantapelkonen, kåʹddhalltõõzz saaǥǥjååʹđteei Tuula Annala, õuddnõsjååʹđteei Ari Pesonen, teeknlaž jååʹđteei Matias Yliriesto, pueʹrrvââjjam- da õuddnõsjååʹđteei Antti Palomaa da jieʹllemvueʹǩǩ-koordinaattor Senja Lakela-Pyykkönen. Sääʹmteeʹǧǧest såbbra vuässõʹtte saaǥǥjååʹđteei Pirita Näkkäläjärvi, I väärrsaaǥǥjååʹđteei Leo Aikio, vaaldâšmjååʹđteei Pia Ruotsala-Kangasniemi, sääʹmteeʹǧǧ vuäzzlaž Armi Palonoja Vuâččast, saaǥǥjååʹđteei vieʹǩǩteei Niina Siivikko di jeeʹres tåimmsuõʹrji veʹrǧǧniiʹǩǩin ǩiõllstaanpiisar Anne Kirste Aikio, jieʹllemvueʹǩǩ- da pirrõslääʹǩǩpiisar Sarita Kämäräinen, ǩiõllpieʹssohjjeei Niina Aikio-Siltala, vs. jieʹllemvueʹǩǩpiisar Maria Valkeapää, vs. pirrõspiisar Tiina Lovisa Solbär da sääʹm-maatkčem jooʹttivuäʹpstõshaʹŋǩǩõõzz plaanni Kirsi Suomi.

Sääʹmteeʹǧǧ da Suäʹđjel kååʹdd õhttsažtuâjjkaaunõõttmõš lij vueʹssen eeǥǥlaž kåʹddõhttsažtuâjjkaaunõõttmõõžžin. Mõõnni vaalpââʹjest õʹnneš vaʹstteei kaaunõõttmõõžž Aanar kooʹddin. Kåʹddõhttsažtuâjjkaaunõõttmõõžžid Uccjooǥǥ da Jeänõõǥǥ kooʹddivuiʹm leät valmštõõllmen da tõid jäʹrjstet čâhčča.

Lââʹssteâđ:

Pirita Näkkäläjärvi
Sääʹmteeʹǧǧ saaǥǥjååʹđteei
044 753 3766
pirita.nakkalajarvi@samediggi.fi

Jari Rantapelkonen
Suäʹđjel kåʹddjååʹđteei
040 615 9880
jari.rantapelkonen@sodankyla.fi