Suomâ haldâttâs adelij sämitiggelaahân kyeskee iävtuttâs ovdâskoodán
Suomâ haldâttâs adelij sämitiggelaahân kyeskee iävtuttâs ovdâskoodán. Tääl adelum iävtuttâs nuávdit Pekka Timosii toimâkode miäldásijd vuáđučuávdusijd. Iävtuttâsân láá tohhum uccâ tärkkilistmeh.
Kove: Ville Fofonoff
Sämitige čuákkim tuhhiittij skammâmáánust 2022 Suomâ haldâttâs iävtuttâs sämitiggeest adelum laavâ nubásmitmist. Siämmást čuákkim mieđettij Sämitige stiivrân vääldi ovdediđ lahâiävtuttâs já táárbu mield ráđádâllâđ nubástusiävtuttâsâin, jis ääši ij pyevti ton huápulâšvuođâ keežild pyehtiđ Sämitige uđđâ čuákkimân.
Sämitigge já riehtiministeriö ráđádâllii sämitiggelaahân kyeskee iävtuttâshammiittâsâst sämitiggelaavâ 9 § mield 1.12.2023. Sämitige stivrâ tuhhiittij ráđádâlmijn oovtmielâlávt staatâst puáttám uccâ tärkkilistmijd Timosii toimâkode iävtuttâsân. – Uccâ nubástusâin peerusthánnáá tääl adelum iävtuttâs sämitiggelaavâ nubásmitmist oovded sämmilij jiešmeridemvuoigâdvuođâ já vuáimánpuáđidijn oskottetteht čuávdá Suomâ olmoošvuoigâdvuotâluávkkáámijd, maid OA olmoošvuoigâdvuotâkomitea lii pahudâm, iätá Sämitige saavâjođetteijee Tuomas Aslak Juuso.
– Mun tuođâi tuáivum, ete taan tove sämitiggelaahâ olášuvá, juátká saavâjođetteijee Juuso.
Uáiviminister Petteri Orpo haldâttâsohjelm mield haldâttâs iävtuttâs sämitiggelaavâst adeluvvoo majemustáá ive 2023 loopâst kansliahovdâ Timosii toimâkode pargo vuáđuld oovtâstpargoost Sämitiggijn. Meid vuáđulahâváljukodde lii vaattâm, ete sämitiggelaahân kyeskee iävtuttâs adeluvvoo ovdâskoodán tállân valjâpaje aalgâst.
Iävtuttâs nuávdit Timosii toimâkode miäldásijd vuáđučuávdusijd
Tolebáá Timosii toimâkode pargo vuáđuld rahtum haldâttâs iävtuttâs tekstâ lii peividum já iävtuttâsân láá tohhum tärkkilistmeh. Nubástusah láá tohhum tuš iävtuttâs 9 §:n, ađai oovtâsttoimâm- já ráđádâllâmkenigâsvuotân. Ton ohtâvuođâst láá sikkum sierâ sajeh, moh kyeskih sämikulttuur hiäjusmittemkiäldoid sehe vaikuttâsâi árvuštâlmân.
Lasseen monâttâllâm oovtâsttooimâst lii tievâsmittum njuolgâdusâin, moi ulmen lii visásmittiđ aašij njyebžilis kieđâvuššâm eromâšávt huápulijn aašijn. Virgeomâhááh almotteh Sämitiigán, ete mon meripeeivi räi Sämitigge kalga almottiđ haalust ráđádâllâđ ääšist. Meriäigi kalga leđe kuáhtulâš já tast puáhtá väldiđ huámmášumán ääši huápulâšvuođâ.
Iävtuttâsân lii meid lasettum Sämitige čuákkim skammâmáánust 2022 iävtuttem Sämitige jesânijd kyeskee siäđus. Lii tárguttâs, ete laavah puátih vuáimán 1.7.2024.
Luuvâ riehtiministeriö tiäđáttâs tääbbin.
Hahâsijđo: https://oikeusministerio.fi/hanke?tunnus=OM066:00/2023
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
