Lääʹdd halltõs uuʹdi sääʹmteʹǧǧlääʹjj kuõskki eʹtǩǩõõzz eeʹttiǩ-kådda
Lääʹdd halltõs uuʹdi täʹbbe sääʹmteʹǧǧlääʹjj kuõskki eʹtǩǩõõzz eeʹttiǩ-kådda. Ååʹn uvddum eʹtǩǩõs jääʹǩǩat Pekka Timonen tåimmkååʹdd meâldlaž vuâđđräʹtǩǩummšid. Eʹtǩǩõʹsse liâ tuejjuum siõm tääʹrǩtummuž.
Snimldõk: Ville Fofonoff
Sääʹmteeʹǧǧ sååbbar priimi skamm-mannust 2022 Lääʹdd halltõõzz eʹtǩǩõõzz sääʹmteeʹǧǧest uvddum lääʹjj muʹttmest. Seämmavuâra sååbbar miõđi Sääʹmteeʹǧǧ halltõʹsse vääʹld oouʹdeed lääʹǩǩehdtõõzz da taarbšeen saǥstõõllâd muuttâsehdtõõzzin, jõs ääʹšš jeäʹt vueiʹt tõn ǩirrlažvuõđ diõtt puʹhtted ođđ Sääʹmteeʹǧǧ såbbra.
Sääʹmteʹǧǧ da vuõiggâdvuõttministeria saǥstõʹlle sääʹmteʹǧǧlääʹjj kuõskki eʹtǩǩõshämmsest sääʹmteʹǧǧlääʹjj 9 § meâldlânji 1.12.2023. Sääʹmteeʹǧǧ halltõs priimi saǥstõõllmõõžžin õõutmiõllsânji riikk beäʹlnn puättam siõm tääʹrǩtummšid Timonen tåimmkååʹdd eʹtǩǩõʹsse. – Siõm muttsin huõlǩâni ååʹn uvddum eʹtǩǩõs sääʹmteʹǧǧlääʹjj muʹttmest oouʹdad säʹmmlai jiõččmieʹrreemvuõiggâdvuõđ da viõʹǩǩepuäʹđeen puätt arvvlõõleld koʹrjjeed ÕM ooumažvuõiggâdvuõttkomitea tuõttmid ooumažvuõiggâdvuõttneuʹrrummšid, särnn Sääʹmteeʹǧǧ saaǥǥjååʹđteeʹjj Tuomas Aslak Juuso.
– Tuäivam tuõđi, što tän vuâra sääʹmteʹǧǧlääʹǩǩ vuäǯǯat maaʹle, juätkk saaǥǥjååʹđteeʹjj Juuso.
Väʹlddminister Petteri Orpo halltõõzz prograamm mieʹldd halltõõzz eʹtǩǩõs sääʹmteʹǧǧlääʹjjest uuʹdet eeʹjj 2023 loʹppe mõõneeʹst kansliašurr Timonen tåimmkååʹdd tuâj vuâđald õhttsažtåimmjummšâst Sääʹmtiiʹǧǧin. Še vuâđđlääʹjjvälljkåʹdd lij õõlǥtam, što sääʹmteʹǧǧlääʹjj kuõskki eʹtǩǩõs uuʹdet eeʹttiǩ-kådda tâʹlsǩani vaalpââʹj aalǥâst.
Eʹtǩǩõs jääʹǩǩat Pekka Timonen tåimmkååʹdd meâldlaid vuâđđräʹtǩǩummšid
Ääiʹjben Timonen tåimmkååʹdd tuâj vuâđald rajjum halltõõzz eʹtǩǩõõzz teʹkstt lij peeiʹvtum da eʹtǩǩõʹsse liâ tuejjuum tääʹrǩtummuž. Muttsid liâ tuejjuum tåʹlǩ eʹtǩǩõõzz 9 §:ffe, leʹbe õhttsažtåimmjem- da saǥstõõllâmõõlǥtõʹsse. Tõn õhttvuõđâst lij jaukkuum pååđ sääʹmkulttuur rââʹžžeemǩiõlddjid di vaaiktõõzzi ärvvtõõllmõõžž kuõskki pääiʹǩ.
Lââʹssen mõõntõõllmõõžž õhttsažtåimmjummšest lij tiudduum šeâttmõõžžin, kooi täävtõssân lij ainsmâʹtted njueʹbǯǯlõs ǩiõttʼtõõllmõš jeäʹrben ǩirrlaž aaʹššin. Veʹrǧǧneeʹǩǩ iʹlmmte Sääʹmtegga, koon mieʹrrpeivva mõõneeʹst Sääʹmteeʹǧǧ âlgg iʹlmmted haaʹleemvuõđâst saǥstõõllâd ääʹššest. Mieʹrrääiʹj âlgg leeʹd mååžna da tõʹst vueiʹtet väʹldded lokku ääʹšš ǩirrlažvuõđ.
Eʹtǩǩõʹsse lij še lââʹzztum Sääʹmteeʹǧǧ såbbar skamm-mannust 2022 eʹtǩǩeem Sääʹmteeʹǧǧ norrõõzz kuõskki šeâttmõš. Lääʹjj liâ jurddum šõddâd viõʹǩǩe 1.7.2024.
Looǥǥ vuõiggâdvuõttministeria teâđtõs tääiʹben.
Haʹŋǩǩõs-seidd: https://oikeusministerio.fi/hanke?tunnus=OM066:00/2023
Lââʹssteâđ:
Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi
