Suoma ráđđehus attii sámediggelága guoski árvalusa riikkabeivviide

Sámedikki čoahkkin dohkkehii skábmamánus 2022 Suoma ráđđehusa árvalusa sámedikkis addojuvvon lága rievdadeami birra. Seammás čoahkkin mieđihii Sámedikki stivrii fápmudusa ovddidit láhkaárvalusa ja dárbbu mielde ráđđádallat rievdadanevttohusaid birra, jos ášši ii sáhte dan hohpolašvuođa dihte buktit ođđa Sámedikki čoahkkimii.

Sámediggi ja vuoigatvuođaministeriija ráđđádalle sámediggelága guoski árvalushápmosis sámediggelága 9 § mielde 1.12.2023. Sámedikki stivra dohkkehii ráđđádallamiin ovttamielalaččat stáhta bealde boahtán smávva dárkkálmahttimiid Timosa doaibmagotti árvalussii. – Smávva nuppástusain fuolatkeahttá dál addojuvvon árvalus sámediggelága nuppástahttimis ovddida sámiid iešmearridanvuoigatvuođa, ja go dat boahtá fápmui, de jáhkkimis dat čoavdá Suoma olmmošvuoigatvuođarihkkumiid, maid ON:id olmmošvuoigatvuođakomitea lea gávnnahan, dadjá Sámedikki ságajođiheaddji Tuomas Aslak Juuso.

– Sávan duođalaččat, ahte dán háve oažžut sámediggelága čađa, joatká ságajođiheaddji Juuso.

Oaiveministtar Petteri Orpo ráđđehusprográmma mielde ráđđehusa árvalus sámediggelágas addojuvvo maŋimustá jagi 2023 loahpas kansliijahoavda Timosa doaibmagotti barggu vuođul ovttasdoaimmas Sámedikkiin. Maiddái vuođđoláhkaváljagoddi lea eaktudan, ahte sámediggelága guoski árvalus addojuvvo riikkabeivviide dalán válgabaji álggus.

Árvalus čuovvu Pekka Timosa doaibmagotti mielde vuođđočovdosiid

Árabut Timosa doaibmagotti barggu vuođul ráhkaduvvon ráđđehusa árvalusa teaksta lea beaiváduvvon ja árvalussii leat dahkkojuvvon dárkkálmahttimat. Nuppástusat leat dahkkojuvvon dušše evttohusa 9 §:i, dahjege ovttasdoaibman- ja ráđđádallangeatnegasvuhtii. Dan oktavuođas leat váldon eret sierranas oasit, mat gusket sámekultuvrra heajudahtti gildosiid ja váikkuhusaid árvvoštallama.

Lassin meannudeapmi ovttasdoaibmama birra lea dievasmahttojuvvon njuolggadusaiguin, maid ulbmilin lea sihkkarastit áššiid njuovžilis gieđahallama erenoamážit hohpolaš áššiin. Eiseválddit almmuhit Sámediggái, man mearrebeaivvi rádjai Sámedikkis lea áigi almmuhit dan birra, ahte háliida ráđđádallat áššis. Mearreáigi galgá leat govttolaš ja das sáhttá vuhtiiváldit ášši hohpolašvuođa.

Árvalussii lea maid lasihuvvon Sámedikki čoakkádusa guoski njuolggadus, man Sámedikki čoahkkin lea skábmamánus 2022 evttohan. Lea dárkkuhuvvon, ahte lágat bohtet fápmui 1.7.2024.

Loga vuoigatvuođaministeriija dieđáhusa dás.
Fidnosiidu: https://oikeusministerio.fi/hanke?tunnus=OM066:00/2023

Lassedieđut:

Tuomas Aslak Juuso
Ságajođiheaddji
040 687 3394
tuomas.juuso@samediggi.fi