Taažâ Sämitigge keigij kielâkampanja "Sáámást munjin" Suomâ Sämitiigán 24.8.2019 Čevetjäävrist
Taažâ Sämitige president Aili Keskitalo keigij Sáámást munjin -kielâkampanja Suomâ Sämitige saavâjođetteijei Tiina Sanila-Aikion nuorttâlij asâiduttem 70 ive juhleest Čevetjäävrist 24.8.2019. Taažâ Sämitigge lii algâttâm kampanja ive 2013. Kampanja ulmen lâi ravkkâđ nuorâi juávhust perustume kevttiđ eenâb sämikielâ já kampanja olášuttii iänááš sosiaallii media peht. Kampanja sirdii Ruotâ Sämitiigán 2016 rääjist.
Taažâ Sämitige president Aili Keskitalo eeđâi sahâvuárustis Čevetjäävrist, ete sij láá lamaš uáli tuđâvááh Sáámást munjin -kampanja siskáldâsân já luhostuumân. Sun meiddei ilodij ko kampanjan puátih ain eenâb sämikielah fáárun – tääl meid nuorttâlâš- já anarâškielah já sun tuáivuttij vala luho kampanjan siämmást ko keigij tom Suomâ Sämitige saavâjođetteijei Tiina Sanila-Aikion.
Suomâ Sämitige saavâjođetteijee Tiina Sanila-Aikio muštottij sahâvuárustis sámástem tehálâšvuođâst, veikâ tot oro-uv motomin vaigâdin já váátá tiätulii valjim. Sanila-Aikio avžuuttij puohâid, kiäh váhá-uv mättih kielâ, sámástiđ ain, tastko mudoi uđđâ suhâpuolvah iä oopâ kielâ ijge kielâsirdem jotkuu.
Suomâ Sämitigge juovij oovtâst nuorâirađđijn nuorttâlij asâiduttem 70 ive juuhlij ääigi Sáámást munjin -raddemeerhâid ulmuid, merkkân já muštottâssân puohháid ete sij pyehtih sámástiđ koskânis. Sämitigge lii meid tuáivum ete Sáámást munjin -kampanja ääigi mij movtáskep máttááttâllâđ pyerebeht monnii eres sämikielâ, vâi mij pyehtip ain eenâb kevttiđ sämikielâ koskânân. Sämitigge almostit lummosänikirje, moin lii älkkee máttááttâllâđ kuulmâ sämikielâ vuáđuaašijd. Suomâ Sämitigge nomâttij meid Ijâttes iijâ -festivaal ohtâvuođâst nelji sämikielâlii kielâofelâš: Sámásteaddji – Säämsteei – Sámásteijee. Nuorttâlâškielâ kielâofelâš Teemu Titola uásálistij Čevertjäävri juhlijd.
Sáámást munjin -kampanja lii uási Sämitige algâaalmugkielâi teemaive.
Lasetiäđuh
Tiina Sanila-Aikio
saavâjođetteijee puh, 010 8392192, tiina.sanila-aikio(at)samediggi.fi
Anne Kirste Aikio
kielâtorvočällee, puh 010 839 3124, anne-kirste.aikio(at)samediggi.fi
