Uđđâ suomâ - anarâškielâ sänikirje almostui!
Uđđâ suomâ – anarâškielâ sänikirje siskeeld ärbivuáválij saanij lasseen uđâssaanijd, moh láá rahtum anarâškielâmáttááttâsân já eres kielâkevttim tárbui várás. Taarna Valtonen lii nuurrâm suomâ – anarâškielâ sánáduv Marja-Liisa Olthuis sánádâhmateriaal vuáđuld.
– Teddilum sänikirje lii lamaš pargo vyelni kuhháá, masa 20 ihheed. Sänilisto lii kale lamaš kiävtust keččâlâddâmmáŋgusin jo maaŋgâid iivijd, mutâ kale taat tuođâi-uv lii vuordum riäntus, illood oppâmateriaalčällee Hannu Kangasniemi.
Sänikirjeest kavnuu uuccâmsääni västideijee anarâškielâ sääni vuáđuhäämi já sujâttemhäämi, mon vuáđuld kevttee puáhtá rähtiđ saanij eres sujâttemhaamijd. Toos lasseen taan kiirján láá merkkejum pelikuhes konsonanteh čuogâstâhmerkkiimáin konsonant vuálá já meiddei vokalij kukkodâhmerkkiimeh kávnojeh taan kirjeest.
– Digitaallij sänikirjij maailmist lii čielgâsávt tile vala teddilum kiirjijd-uv, juátká Kangasniemi, puohah iä lah hárjánâm kevttiđ šleđgâlâš sänikiirjijd já veikkâba möökist tâi meecist lii vuovâs laađiistâllâđ pááppárkirje, mon puáhtá toollâđ kieđâi kooskâst.
Uđđâ kiirjijd puáhtá tiiláđ Sämitige škovlim- já oppâmateriaaltoimâttuvvâst. Duodji Shop meid vuábdá kirje.
