Sämitige vaaljâi jienâirekinistem

Valjâlävdikodde aalgât jienâirekinistem valjâtoimâttâs maŋa vuossaargâ 1.7.2024 tme 18 Sajosist Anarist. Jienâirekinistem maŋa puáttám vuolgâttâskovertijd kyeđih leehâsthánnáá já huámmášumán väldihánnáá. Toimâttâsâst tuálloo pevdikirje.

Väljejeijeeseervi äššiulmust tâi väriäššiulmust lii vuoigâdvuotâ leđe mieldi jienâirekinistmist.

Merkkim valjâluvâttâlmân

Jienâirekinistem algâttuvvoo tienuuvt, ete lehâsteh puoh poostâ peht meriääigi siste puáttám já valjâlävdikode toimâttâhân macâttum macâttemkovertijd. Valjâlävdikodde merkkee puoh ulmuid, kiäh láá  jienâstâm, vuolgâttâskooveert miäldásávt valjâluvâttâlmân.

Jienâstem kalga kyeđđiđ huámmášumán väldihánnáá:

  1. jis jienâstâm olmooš ij lah merkkejum valjâluvâttâlmân jienâvuoigâdvuođâlâžžân tâi jis itá, ete sun lii jáámmám ovdil valjâtoimâttâs algâttem;
  2. jis vuolgâttâsreivâ lii nuuvt vááijuvlâš, ete ij vissásávt pyevti pahudiđ, ete kii lii jienâstâm; tâi
  3. jis valjâkovertân lii rahtum jienâsteijei tâi iävtukkâsân kyeskee tâi eres äšittes merkkim.

Ko puoh jienâstâm ulmuuh láá merkkejum valjâluvâttâlmân já jienâstmist huámmášumán väldihánnáá kuođđum valjâkoverteh vuolgâttâskovertijguin láá sierrejum tuhhiittum kovertijn, te tuhhiittum valjâkoverteh piäijojeh leehâsthánnáá valjâuurnán.

Jienâstemliipui jyehim juávhoid

Ko puoh tuhhiittum valjâkoverteh láá valjâurnáást, te lehâsteh puoh valjâurnáid já valjâkovertijd.

Jienâi rekinistem várás jienâstemliipuh juáhhojeh juávhoid tienuuvt, ete jieškote-uv iävtukkâs pyerrin adelum jienah láá jieijâs juávkkun. Hilgum jienâstemliipuh sierrejuvvojeh jieijâs juávkkun. Jieškote-uv juávhust orroo jienâstemliipui lohomeeri rekinistoo. Jienâirekinistmist tuálloo sierâ pevdikirje.

Jienâstemliipu hilgom

Jienâstemlippu lii hilgum:

  1. jis valjâkovertist lii eres-uv ko ohtâ jienâstemlippu;
  2. jis jienâstem lii kuođđum huámmášumán väldihánnáá 35 §:st asâttum vuáđustâssáin;
  3. jis jienâstemlippun lii kevttum eres ko valjâlävdikode teddilem stemppâlistum jienâstemlippu;
  4. jis iävtukkâs nummeer lii merkkejum tienuuvt, ete ij čielgâsávt uáini ete kiäs jienâ lii uáivildum; já
  5. jis jienâstemliipun lii čallum jienâsteijee nommâ tâi toos lii rahtum eromâš tobdomerkkâ tâi eres äšittes merkkim; äšitteemmin ij annoo merkkim, mii tuše čielgâsmit, ete mon iävtukkâs jienâsteijee lii halijdâm jienâstiđ.

Käldee: Laahâ sämitiggeest 17.7.1995/974