Sämitige vaaljâi puátusij meridum
Sämitige jesânin šaddeh väljejuđ 21 enâmustáá jienâid finnim iävtukkâssâd, toin iävttoin, ete sii juávhust láá ucemustáá kulmâ iävtukkâs jieškote-uv sämmilij päikkikuávlu kieldâst. Jis monnii tain kieldâin iä lah kulmâ iävtukkâs taan juávhust, te taan kieldâst orroo iävtukkâsâin šaddeh väljejuđ enâmustáá jienâid finnim kulmâ iävtukkâs.
Värijesânin šadda väljejuđ jieškote-uv sämikuávlu kieldâst orroo iävtukkâsâin väljejum šoddâm iävtukkâsâi maŋa čuávuvážžân enâmustáá jienâid finnim iävtukkâs.
Jis jienâmereh láá siämmáá stuárráh, te toi koskâsâš oornig čuávdoo vuárbumáin.
Vaaljâi puátusij nonnim
Vaaljâi puáttus nannee valjâlävdikodde čuákkimist, mon tot tuálá kuálmád peeivi jienârekinistem aalgâtmist 3.7.2024 tme 18.
Vaaljâi puáttus kalga almottiđ tállán riehtiministeriön, vâi sämitige jesâneh já värijesâneh meriduvvojeh toimâsis čuávvoo toimâpajan.
Vaaljâi puátusân kyeskee njuolgimvátámâš já väidim
Jienâvuoigâdvuođâlâš, kote ana, ete valjâlävdikode miärádâs vaaljâi puáttus nonniimist tâi vaaljâi tooimâtmân lohtâseijee eres toimâ lii laavâvuástásâš, puáhtá toohâđ sämitige stiivrân njuolgimvátámâš majemustáá 14 peeivi ton peeivist, kuás valjâlävdikodde lii nonnim vaaljâi puáttus.
Sämitige stivrâ kalga kieđâvuššâđ njuolgimvátámâš huápulávt já majemustáá ovdil valjâive loopâ.
Sämitige stiivrâ miärádâsân uážžu uuccâđ nubástus väidimáin alemuu haldâttâhriähtán majemustáá 14 peeivi ton peeivist, kuás äššiomâhâš lii finnim tige stiivrâ miärádâs tiättun. Nubástusucâmist nuávditteh mudoi, mii haldâttâhlaavâkevttimlaavâst asâttuvvoo.
Jis valjâlävdikode 1 momentist uáivildum miärádâs tâi toimâ lii lamaš laavâvuástásâš já taat lii vaiguttâm vaaljâi puátusân, te vaaljâi puáđus kalga njuolgiđ já staatârääđi táárbu mield meridiđ sämitige jesânijd já värijesânijd vaaljâi njyelgejum puáttus miäldásávt.
Jis vaaljâi puáttus ij pyevti njuolgiđ, te vaaljâid kalga meridiđ uđđâsist toimâttemnáál.
Käldee: Laahâ sämitiggeest 17.7.1995/974
