Sämitige vaaljâi toimâttem 2024
Sämitige vaaljah toimâttuvvojeh uđđâsist 3.6.–1.7.2024. Vaaljâin väljejuvvojeh 21 jesânid já nelji värijeessân Sämitiigán toimâpajan 2024 –2027. Jienâsteijee finnee valjâäššikiirjijd kirjettum reivân kesimáánu 3. peeivi rääjist postâčujottâsân, mii lii almottum aalmugtiäđoid. Jienâsteijee, kote aasah olgoenâmijn, mušte almottiđ čujottâsnubástusâst mijjân já Digi- já aalmugtiätuvirgádâhân. Tot, ete čujottâs lii ääigi tääsist, lii tehálâš valjâäššikiirjij vuolgâtmist.
Jienâsteijee kalga viežžâđ kirjettum reeivâ jieijâs postâtoimâpääihist, ko lii finnim almottâs poostâst. Kirjettum reeivâ puáhtá viežžâđ meid jienâsteijee adelem väldikirjijn. Vaaljâin jienâstem tábáhtuvá tienuuvt, ete jienâsteijee maacât vuolgâttâsreeivâ, mon sun lii jieš vuáláčáállám, já valjâkovertân toppum valjâliipu poostâ peht kirjettum reivân valmâšin maksum já tevdum vuolgâttâskovertist. Jienâsteijee, kote áásá olgoenâmijn, kalga mäksiđ postâmáávsu jieš.
Valjâäššikiirjijd kalga toimâttiđ poostân puorijn aaigijn tienuuvt, ete toh kiergâneh Anarân majemustáá 1.7.2024 ovdil jienârekinistem algâttem tijme 18.00. Valjâlävdikodde ij pyevti väldiđ huámmášumán jienârekinistmist valjâäššikiirjijd, moh láá puáttám 1.7.2024 tijme 18.00 maŋa.
Jienâsteijee puáhtá poostâ sajan macâttiđ jieijâs valjâäššikiirjijd meid persovnlávt virgeääigi 17. – 28.6.2024 kooskâst valjâlävdikode toimâttâhân čujottâsân
Säämi kulttuurkuávdáš Sajos
Sämitigge, valjâlävdikodde
Menesjärventie 2 A
99870 Aanaar
tâi valjâauton, mii jotá sämikuávlust. Valjâauto äigitavlu almottuvvoo valjâäššikiirjij ohtâvuođâst.
Valjâpeeivi jienâstem ij uárnejuu ive 2024 uđđâ vaaljâin.
