Sääʹmteeʹǧǧ vaali tooiʹmtummuš 2024
Sääʹmteeʹǧǧ oođeed mieʹrruum vaalid tooiʹmtet 3.6.–1.7.2024. Vaalivuiʹm vaʹlljeet 21 vuäzzliʹžžed da nellj väärrneeʹǩǩ sääʹmtegga tåimmpââjas 2024 –2027. Jiõnsteei vuäǯǯ vaaläʹššǩiiʹrjid ǩeeʹrjuum ǩeʹrjjen ǩieʹssmannu 3. peeiʹvest looǥǥeeʹl suu narodteâđaid iʹlmmtem pååʹštaddrõʹsse. Ålggjânnmin jälsteei jiõnsteei, muuʹšt iʹlmmted addrõsmuttsest miʹjjid da Digi- da meerteâttkonttra. Vaaläʹššǩiiʹrji vuõlttummšest täʹrǩǩ lij ääiʹjtässʼsaž addrõs.
Jiõnsteei âlgg viǯǯâd ǩeeʹrjuum ǩeeʹrj jiiʹjjes pååʹšt-tåimmpääiʹǩest mâŋŋa ko lij vuäǯǯam iʹlmmtõõzz pååʹštest. Ǩeeʹrjuum ǩeeʹrj vueiʹtet viǯǯâd še jiõnsteei uʹvddem väʹlddǩiiʹrjin. Vaalin jiõnstummuš mâânn nuʹtt, što jiõnsteei maaccad vuâllaǩeeʹrjteʹmes sättǩeeʹrj da vaalkuõʹrre kattum vaal-liipp pååʹšt mieʹldd ǩeeʹrjuum ǩeʹrjjen valmmša mahssum da tiuddum sättkuõr seʹst. Ålggjânnmin jälsteei jiõnsteei âlgg jiõčč mäʹhssed pååʹštmääus.
Vaaläʹššǩeeʹrj âʹlǧǧe tooiʹmted pååšta juʹn ääiʹjben nuʹt, što tõk ǩiõrggne Aanra mââimõõzzâst 1.7.2024 õuʹddel jiõnnlaʹsǩǩeem alttummuž čiâss 18.00. Vaal-luʹvddkåʹdd ij vueiʹt väʹldded jiõnnlaʹsǩǩummšest lokku 1.7.2024 čiâss 18.00 mâŋŋa pueʹtti vaaläʹššǩiiʹrjid.
Jiõnsteei vuäitt pååʹšt sâjja maaccted äʹššǩiiʹrjeez še jiõčč veʹrǧǧäiʹǧǧen 17.–28.6.2024 äiʹǧǧkõõskâst vaal-luʹvddkååʹdd konttra addrõʹsse
Sääʹmkulttuurkõõskõs Sajos
Sääʹmteʹǧǧ, vaal-luʹvddkåʹdd
Menesjärventie 2A
99870 Aanar
leʹbe sääʹmvuuʹdest jooʹtti vaalauʹtte. Vaalaaut äiʹǧǧtaaul iʹlmmtet vaaläʹššǩiiʹrji õhttvuõđâst.
Vaalpeeiʹv jiõnstummuž jeät jäʹrjstuku oođeed mieʹrruum vaalin eeʹjj 2024.
