Sámedikki válggaid doaimmaheapmi 2024
Sámedikki válggat ordnejuvvojit ođđasit 3.6.–1.7.2024. Válggain válljejuvvojit 21 lahtu ja njeallje várrelahtu Sámedikki doaibmabadjái 2024–2027. Jienasteaddji oažžu válgaáššebáhpáriid girjejuvvon breavan geassemánu 3. beaivve rájes poastačujuhussii, man lea almmuhan veahkadatdieđuide. Olgoriikkain ássi jienasteaddji galgá muitit almmuhit čujuhusnuppástusas midjiide ja Digi- ja álbmotdiehtodoaimmahahkii. Rivttes čujuhus lea dehálaš válgaáššebáhpáriid sáddema dihte.
Jienasteaddji galgá viežžat girjejuvvon breava iežas poastadoaibmabáikkis, go lea ožžon almmuhusa poasttas. Girjejuvvon breava sáhttá viežžat maiddái váldegirjjiin, man jienasteaddji lea addán. Válggain jienasteapmi dáhpáhuvvá nu, ahte jienasteaddji máhcaha vuolláičállon sáddenbreava ja válgakonfeluhttii biddjon válgalihpo sáddenkonfeluhtas, mii lea gárvvisin máksojuvvon ja devdojuvvon, poastta fárus girjejuvvon breavan. Olgoriikkain ássi jienasteaddji galgá máksit poastamávssu ieš.
Válgaáššebáhpáriid galgá doaimmahit postii doarvái áiggil nu, ahte dat gerget Anárii maŋimustá 1.7.2024 ovdal jienaidrehkenastima álgima dmu 18.00. Válgalávdegoddi ii sáhte vuhtiiváldit jienaidrehkenastimis válgaáššebáhpáriid, mat lea joavdán 1.7.2024 dmu 18 maŋŋá.
Jienasteaddji sáhttá poastta sajis máhcahit iežas válgaáššebáhpáriid maiddái persovnnalaččat virgeáigge áigodagas 17.–28.6.2024 válgalávdegotti doaimmahahkii čujuhussii
Sámekulturguovddáš Sajos
Sámediggi, válgalávdegoddi
Menesjärventie 2A
99870 Anár
dahje sámeguovllus johtti válgabiilii. Válgabiilla áigetávvala birra almmuhuvvo válgaáššebáhpáriid oktavuođas.
Dáid válggain, mat lágiduvvojit ođđasit jagi 2024, ii leat válgabeaivve jienasteapmi.
