Sámediggi evttoha lahtuid ođđa nuppástusohcanlávegoddái - lávdegotti ságajođiheaddjin evttohuvvo Oula-Antti Labba
Sámediggi evttoha stáhtaráđđái, ahte nuppástusohcanlávdegotti ságajođiheaddjin nammaduvvo Oula-Antti Labba. Siidodoaibmasaš láhkaolmmošlahttun evttohuvvo Piia Nuorgam ja áššedovdilahttun Juha Guttorm ja Marko Tervaniemi. Láhkaolmmošlahttun evttohuvvo Anni-Kristiina Juuso ja áššedovdivárrelahttun Rauna Rahko-Ravantti ja Joni Gauriloff. Sámediggi mearridii áššis čoahkkimis 26.2.2026.
Nuppástusohcanlávdegoddi lea iehčanas ja sorjjasmeahttun doaibmaorgána, mii doaibmá vuosttas nuppástusohcandássin Sámedikkis addojuvvon lága 26 §:s oaivvilduvvon válgalogahallamii váldima ja das eret bidjama guoski áššiin. Stáhtaráđđi ásaha nuppástusohcanlávdegotti guđa jahkái hávil Sámedikki evttohusas.
Nuppástusohcanlavdegotti ságajođiheaddji ja láhkaolmmošlahttu galgaba deavdit duopmostuollolága (673/2016) 10 čuoggá 1 § 1 ásahuvvon duopmára almmolaš gelbbolašvuođagáibádusaid. Eará lahtuin gáibiduvvo vuoiggalašvuohta, dovdamuš lávdegotti doaibmasuorggis ja bargguid dikšumii dárbbašlaš persovnnalaš iešvuođat.
Lahtut eai dárbbaš leat merkejuvvon Sámedikki válgalogahallamii, muhto sii eai sáhte leat Sámedikki dahje válgalávdegotti lahtut dahje várrelahtut eaige Sámedikki bálvalusas. Lávdegotti lahtut ja várrelahtut eai maiddái sáhte leat evttohassan Sámedikki válggain, ja sii galget almmuhit iežaset čatnagasvuođaid lágas gáibiduvvon vugiin vuoigatvuođaministeriijai ja nuppástusohcanlávdegoddái.
Sámedikki čoahkkin evttoha lassin stáhtaráđđái das, ahte gažaldat nuppástusohcanlavdegotti ságajođiheaddji váldodoaibmasašvuođas dahje oasseáigásašvuođas sirdojuvvošii lávdegoddái alcces čoavdinláhkai lávdegotti ortniiduvvama oktavuođas lávdegotti iehčanasvuođa ja sorjjasmeahttunvuođa sihkkarastima várás.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
