Sámedikki sode-sektora Helssega galledeapmi vuojui sámiid sode-bálvalusaid ovddideapmái
Sámedikki sosiála- ja dearvvasvuođasektor galledii Helssegis 12.-13.3. deaivvadeamen guovddáš ovttasbargobeliid. Sámedikki ovddasteaddjit deaivvadedje Mela, THL Biobank ja Findata ja maid sosiála- ja dearvvasvuođaministeriija ovddasteaddjiiguin.
Govas Riitta Lehtola-Kosonen, Tuomas Aslak Juuso, Anni Koivisto ja Mela Pirjo Saari ja Sonja Lilius.
Sámediggi deaivvadii Mela ovttadathoavda Pirjo Saariin ja láhkaáššiid hoavda Sonja Liliusain duorastaga 12.3. Deaivvadeamis ságastallojuvvui erenomážit Beroš boazodoallis -doaimma ovddideamis ja ollašuhttimis sámebálgosiid ja sámeboazodolliid oaidninviŋkilis. Ságastallamiin deattuhuvvui dárbu ovddidit bálvalusa ja doaimma ovttas sámedoibmiiguin, nu ahte erenomážit bálvalusain vuhtiiváldo sámekultuvra ja sámegiella.
Sámedikkis deaivvadeapmái serve ságajođiheaddji sadjásaš Tuomas Aslak Juuso, sosiála- ja dearvvasvuođačálli Riitta Lehtola-Kososen ja vs. sosiála- ja dearvvasvuođačálli Anni Koivisto.
Sámediggi oahpásmuvai THL Biopankki ja Findata doibmii
Sámedikki sode-čállit Riitta Lehtola-Kosonen ja Anni Koivisto oahpásmuvaiga Dearvvasvuođa- ja buresveadjima lágádusa váldokantuvrras Tilkamäkis Biopankki ja Findata doibmii duorastaga 12.3. THL Biopankki lea riikkaviidosaš biobáŋku, masa čoggojuvvojit ja mas seailluhuvvojit mávssolaš dutkančájánasat olles Suoma guovllus. Findata lea sosiála- ja dearvvasvuođasuorggi diehtolohpeeiseváldi. Guktuiguin doibmiiguin gažaldat lei vuosttas ovttasbargodeaivvadeamis.
Deaivvadeamis gieđahallojuvvojedje Biopankki ja Findata doaimmat ja vejolašvuođat boahttevaš ovttasbargui. Findatas lea dehálaš rolla sosiála- ja dearvvasvuođadieđuid sekundára geavaheamis, mas dieđut geavahuvvojit ovdamearkka dihte dutkamuššii, statistihkaid ráhkadeapmái ja ovddideapmái aitosaš dikšo- dahje áššiiddikšundili olggobealde
Govas Riitta Lehtola-Kosonen, Tuomas Aslak Juuso, Anni Koivisto ja sosiála- ja dearvvasvuođaministeriijas Veli-Mikko Niemi ja Anna Cantell-Forsbom.
Deaivvadeapmi sosiála- ja dearvvasvuođaministeriija ovddasteaddjiiguin
Sámediggi deaivvadii dasa lassin sosiála- ja dearvvasvuođaministeriija kansliijahoavda Veli-Mikko Niemiin ja sosiála- ja dearvvasvuođafuolahusa áššehasat ja bálvalusat -ossodaga hoavda Anna Cantell-Forsbomiin 12.3. Deaivvadeamis ságastallojuvvui sámiid sosiála- ja dearvvasvuođabálvalusaid sihkkarastimii ja ovddideapmái čujuhuvvon stáhtadoarjaga dilis ja sámi psykososiála doarjaga ovttadaga Uvjj – Uvjâ – Uvjja joatkkaruhtadandárbbuin ja doaimma stáđásmahttimis.
Sámedikkis deaivvadeapmái serve ságajođiheaddji sadjásaš Tuomas Aslak Juuso, vs. sosiála- ja dearvvasvuođačálli Anni Koivisto ja sosiála- ja dearvvasvuođačálli Riitta Lehtola-Kososen.
Sámediggi ja Dearvvasvuođa ja buresveadjima lágádus (THL) čoahkkinaste Helssegis 13.3. jahkásaš ovttasbargoráđđádallamiin. Čoahkkimis mearriduvvui jagi 2026 ovttasbarggu deattuhusaid birra.
Lassedieđut
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Riitta Lehtola-Kosonen
Sosiála- ja dearvvasvuođačálli
044 777 4820
riitta.lehtola-kosonen@samediggi.fi
Anni Koivisto
vs. sosiála- ja dearvvašvuođačálli
044 775 6560
anni.koivisto@samediggi.fi
