Anára gielda ja Sámediggi jotke ovttasbargodeaivvademiid - áššelisttus earet eará sámegielat árrabajásgeassima ja oahpahusa ruhtadeami dorvvasteapmi
Anára gieldda ja Sámedikki ovddasteaddjit deaivvadedje 3. čakčamánu 2025 Avvilis gielddadálus oktasaš ovdogohcima joatkima ja ovttasbarggu ovddideami dihtii. Jeavddalaš deaivvademiid ordnemis sohppojuvvui vuosttas ovttasbargodeaivvadeami olis jagi 2023.
Govva: Ville Fofonoff
Dán háve deaivvadeamis oktasaš ovdogohcima guovddážis ledje erenomážit sámegielat árrabajásgeassima ja oahpahusa ruhtadeami dorvvasteapmi. Ságastallamiin deattuhuvvojedje eatnigielat árabajásgeassin sihke giellabeassedoaibma, dasgo boahtte jagi stáhtadoarjagiidda leat boahtimen nuppástusat, main lea váikkuhus sámegielat árabajásgeassima stáhtadoarjagii.
Anára gielddas geavahuvvojit virggálaččat buot golbma Suomas hállon sámegiela: anárašgiella, nuortalašgiella ja davvisámegiella. Deaivvadeamis lei ovttamielalašvuohta das, ahte sámegielaid eallinfámu dorvvasteapmi gáibida guhkesáigásaš ovttasbarggu ja doarvái olu resurssaid.
Čoahkkimis gieđahallojedje maid ealáhusaide, eanageavaheapmái ja buriide olmmošgaskavuođaide gullevaš áigeguovdilis áššit sihke buresveadjináššit. Oktasaš ovdogohcima čuozáhahkan lea ain Pokka luotta dahjege Anára ja Gihttela ovttastahtti guovlluluotta 955 vuođđodivvun.
Dasa lassin guorahallojedje boahtteáiggi konkrehta ovttasbargovuogit Oassebealit dovddahedje dáhtu joatkit deaivvademiid ja ovddidit ovttasbarggu viidáseappot.
–Lea dehálaš ahte lea rabas ságastallan jámma Sámedikki ja Anára gieldda gaskka, ee. bálvalusaid ordnemii ja lundui laktáseaddji temáid birra. Boahttevuođas lea erenomáš dehálaš ovttas dorvvastit sámegielat árabajásgeassima, vuođđooahpahusa ja eará bálvalusaid stáhta ruhtadeami sámeguovllu gielddain, dadjá Anára gieldda hoavda Tommi Kasurinen.
– Sámiid ruovttuguovllu gielddaid rolla lea guovddážis das, mo sápmelaččaid vuoigatvuođat ollašuvvet geavadis. Lean ilus, ahte mis lea Anára gielddain oktasaš dáhttu ovddidit doaimma ja nannet ovttasbarggu, dadjá I várreságadoalli Leo Aikio.
Čoahkkimii oassálaste Anára gielddas váldostivrra ságadoalli Jari Huotari, gielddastivrra 1. várreságadoalli Anu Avaskari, gieldda hoavda Tommi Kasurinen ja sierra doaibmasurggiid virgeolmmošjođiheaddjit. Sámedikkis čoahkkimii oassálaste gielddaid ovttasbarggus vástideaddji sámedikki várreságadoalli Leo Aikio ja hálddahushoavda Pia Ruotsala-Kangasniemi sihke sierra doaibmasurggiid virgeolbmot.
Lassedieđut
Anára gielda
Tommi Kasurinen
Gielddahoavda
050 548 4123
tommi.kasurinen@inari.fi
Sámediggi
Leo Aikio
I várreságadoalli
040 621 6505
leo.aikio@samediggi.fi
