Sajosis ávvuduvvo ođastuvvon sámediggeláhka ja logijagiid bargu – ávvudilálašvuohta jođus dál

Dilálašvuohta lea álgán Suoma, Norgga ja Ruoŧa Sámedikkiid sáhkavuoruiguin ja earret eará dásseválddi presideantta, oahpahusministera ja europarlamentarihkkár Anna-Maja Henrikssona dearvvahusaiguin. Dasa lassin mii leat gullan árbevirolaš sámemusihka.

Suoma Sámedikki ságajođiheaddji Pirita Näkkäläjärvi giittii iežas sáhkavuorus sámeálbmoga ja sámiid ustibiid sitkatvuođas ja áŋgirvuođas.

– Sámediggelága ođasmahttin lea leamaš sámeservoša hui stuorra oktasaš rahčamuš, mii válddii loahpa loahpas 30 jagi áiggi. Láhka lea dál ođastuvvon, guhkes biidnu lea meattá ja dan mielde noađđi lea eret čuovvovaš buolvvaid hárduin, ságajođiheaddji Näkkäläjärvi dajai.

Ságajođiheaddji Näkkäläjärvi doallá riikkaidgaskasaš olmmošvuoigatvuohtasoahpamušaid mearkkašahttin sámediggelága ođastusas.

– Mii eat livčče dás, jos ON:t eai livčče addán Supmii sivalažžan cealki čovdosiid Sámedikki válgalogahallama birra. Suoma stáhta fertii viimmat dahkat juoidá. Riikkaidgaskasaš riekti ja njuolggadusvuđot vuogádat leat unna álbmogiid ja riikkaid ovdu, ságajođiheaddji Näkkäläjärvi muittuhii.

Dásseválddi presideanta Alexander Stubb dajai iežas dearvvahusas, man lei sádden ávvudeapmái, ahte sámiid vuođđolágas dáhkiduvvon sierrasajádaga gáhtten eamiálbmogin lea min buohkaid oktasaš bargu.

– Guhká vurdojuvvon ođđa sámediggeláhka lea boahtán fápmui. Ulbmilin lea, ahte dan geažil sámiid iešmearridanvuoigatvuođa ollašuvvama ja sámekultuvrra iešráđálaš ovddideami sáhttá boahtteáiggis dorvvastit buorebutgo ovdal, presideanta Stubb dajai.

– Sámedikki doaibma gullá mearkkašahttiláhkai sámiid iešráđđema ja vuoigatvuođaid dorvvasteapmái. Sámedikki ja eiseválddiid ságastallama joatkašuvvamis ja sámiid gullamis mearrádusbargama oktavuođas galgá fuolahit buot servodaga dásiin, presideanta Stubb jotkkii.

Suoma stáhta dearvvahusa ávvudeapmái buvttii oahpahusminister Anders Adlercreutz. Oahpahusministtar Adlercreutz logai sáhkavuorustis ahte ráđđádallanmeannudemiid dáfus ii leat dehálaš dušše dat mii čuožžu paragráfain – muhto baicce dat mo mii doaibmat. Dat guoská erenomážit eiseválddiid ja Sámedikki gaskasaš ovttasdoaibman -ja ráđđádallanmeannudeami.

– Láhka mearrida dál dárkilabbot go ovdal meannudeamis, mainna figgat sihkkarastit sámiid rievtti oassálastit ja váikkuhit áššiide, mat gusket sidjiide. Albma ráđđádallan gáibida lihkká vel eanet. Duohta ráđđádallamii gullá guldaleapmi, rehálašvuohta ja dat ahte háliida gávdnat oktasaš čovdosiid maiddái dalle, go dat gáibida áiggi, oahpahusministtar Adlercreutz dajai.

Iežas dearvvahusa ávvudeapmái buvttii maiddái europarlamentarihkkár Anna-Maja Henriksson. Son doaimmai árabut vuoigatvuođaministerin ja lei mielde sámediggelága ođasmahttimis máŋgga válgabaji áigge.

– Lea olles áigge leamašan sáhka sámiid iešmearridanrievtti gudnejahttimis ja dakkár lága ásaheamis mii čuovvu daid riikkaidgaskasaš soahpamušaid, mat geatnegahttet Suoma, europarlamentarihkkár Henriksson celkkii.

– Lean maiddái duođaid ilus go beasan joatkit ovttasbarggu dinguin Eurohpa parlameantta lahttun. Eurohpa áidna eamiálbmogin din rivttiid galgá nannet maiddái Eurohpa dásis. Din mieldeorruma maiddái Eurohpa parlameanttas ja Brusselis galgá ovddidit, Henriksson jotkkii.

Dilálašvuođas gullojedje lassin Norgga ja Ruoŧa Sámedikkiid ovddasteaddjiid sáhkavuorut. Sáhkavuoruin lea čalmmustahtton sámiid ovttasbarggu mearkkašupmi sámiid vuoigatvuođaid ovddideamis riikkarájaid badjel ja oktasaš hástalusat.

Eahketbeaivve prográmma joatkašuvvá panelaságastallamiin, man jođiha Suvi West. Panelas muittašit sámediggelága ođasmahttinproseassa ja geahččat lága ollašuhttima guvlui.

Dilálašvuohta nohká dii. 15.30 oktasaš káfestallamii Sajosis, ja ávvubeaivi nohká eahkedis Ulla Pirttijärvi & Ulda -musihkkajoavkku konsertii, mii ordnejuvvo Sajosa Dolla -auditoriijas.

Eahketkonsearta lea rabas buohkaide iige dasa dárbbaš ovddalgihtii almmuhit iežas. Báikkiid mearri lea rájálaš ja dat devdojit boahtinortnegis, de báikki ala gánneha boahtit áiggil.

• Beaivvi prográmma sáhttá čuovvut gáiddusoktavuođa bokte tulkomiin čujuhusas: https://us06web.zoom.us/j/84081619667
• Konseartta sáhttá čuovvut čujuhusas: www.sajos.fi/live
• Sáhkavuoruid ja dearvvahusaid sáhttá lohkat Sámedikki dokumeantabáŋkkus.

Dilálašvuođa vurkemiid sáhttá geahččat guovtti vahku áigge dáhpáhusa maŋŋá. Liŋkkat vurkemiidda almmustahttojit maŋŋelabbos Sámedikki neahttasiidduin ja sosiála media kanálain.

Lassedieđut

Pirita Näkkäläjärvi
Ságajođiheaddji
044 7533 766

Saara-Maria Salonen
saara-maria.salonen@samediggi.fi
044 739 4007

Johanna Alatorvinen
Dieđihančálli
040 663 4493
johanna.alatorvinen@samediggi.fi