Sámediggi almmustahttá rávvaga vánhemiidda sámi árrabajásgeassimii ohcaleamis

Rávvagat leat gáibiduvvon gielddain erenomážit danin, ahte guovddáš erohusat sámegiela eatnigiellan hálli mánáid árrabajásgeassima ja giellabesiid gaskkas gávdnošedje čielgasit ovtta sajis.

-Ráva lea oanehaš ja deattuha vuođđoáššiid. Lea dieđusge veadjemeahttun čohkket seamma áigge oanehaččat ja nu gokčevaččat go vejolaš buot áššiid sámi árrabajásgeassimis, muhto doaivvu mielde vánhemat gávdnet rávvaga ja dat veahkeha sámi árrabajásgeassimii ohcaleamis, gávnnaha giellabeassejođiheaddji Niina Aikio-Siltala.

Ráva gullá stuorát ollisvuhtii, mainna ulbmilin lea ovttaiduhttit sámi árrabajásgeassima geavadagaid ja álkidahttit sihke árrabajásgeassima ordnejeaddjiid ja árrabajásgeassima bargiid barggu. Ollisvuhtii gullá maiddái gielddaid geavahussii oaivvilduvvon ráva ságastallamis, man galgá čađahit ovdalgo báiki mieđihuvvo sámi árrabajásgeassimis. Guktot rávvagat leat ráhkaduvvon go gielddat leat sávvan daid.

Go bearaš ohcá báikki sámi árrabajásgeassimis, bearrašiin ordnejuvvo ságastallan, mainna ulbmilin lea gávdnat aiddo iežas bearrašii heivvolaš árrabajásgeassinbálvalusa.

-Dát geavadat lea leamaš geavahusas juohke gielddas árabutge, muhto dál buot gielddaide boahtá geavahussii seamma vuođđu ságastallamii ja de sisdoallu lea buot gielddain seammalágan. Ságastallan čađahuvvo ovdal go árrabajásgeassinbáiki mieđihuvvo, vai bearraša bálvalandárbbus fidnejuvvo buorre govva juo ovdal árrabajásgeassima álggaheami, muitala Aikio-Siltala.

Goalmmát ollisvuohtan Sámediggi áigu ráhkadit sámi árrabajásgeassima pedagogalaš linnjemiid. Linnjemat bohtet doaibmat erenomážit sámi árrabajásgeassima bargiid dutkanmateriálan ja daid ulbmilin lea iežaset oasis ovttaiduhttit sámi árrabajásgeassima pedagogihka buot ovttadagain.

• Rávvagat vánhemiidda sámi árrabajásgeassimii ohcaleamis (pdf)

Lassedieđut

Niina Aikio-Siltala

Giellabeassejođiheaddji
040 487 5414 / 010 839 3115
niina.aikio-siltala@samediggi.fi