Sámediggi ja oahpahus- ja kulturministeriija álggahit sámegiela oahpahusa ovddidanbargojoavkku doaibmabidjoevttohusaid ovddideami

Deaivvadeamis bođii ovdan dárbu oaidnit ja nannet sámi skuvlenbálgá ollisvuohtan. Dasa lassin deaivvadeamis gávnnahuvvui, ahte ovddidanbargojoavkku doaibmabidjoevttohusat sisttisdollet stuorát gažaldagaid, mat gáibidit ruhtadanmearrádusaid ja láhkaásaheami guorahallama. Dan lassin leat maiddái dakkár sámegielat ja sámegielaid oahpahusa ovddidandoaimmat, maid lea álkit ollašuhttit ovdamearkkadihte diehtojuohkima beavttálmahttimiin ja aktiivvalaš fierpmádatbarggu bokte. Deaivvadeamis sohppojuvvui makkár málliin bargu jotkojuvvo.

– Sámediggi giitá kansliijahoavda Anita Lehikoinena das, ahte lea váldán vuhtii dan, man dehálaš lea ovddidit sámeoahpahusa. Oktasaš áddejupmi sámeoahpahusa dilis lea earenomáš mávssolaš vai  áššiid sáhttá doalvut ovddosguvlui. Čuovvovažžan livččiige ulbmilin kártet ovttas movt ovdánit doaibmabijuiguin boahtteáiggis, dadjá Sámedikki ságadoalli sadjásaš Tuomas Aslak Juuso.

Sámedikkis čoahkkimii oassálaste ságajođiheaddji sadjásaš Tuomas Aslak Juuso, skuvlen- ja oahppamateriálalávdegotti ságajođiheaddji Anni Koivisto, skuvlenčálli Bigga-Helena Magga ja láhkačálli Kalle Varis. Gáiddusoktavuođaid bokte mielde ledje gielladorvočálli Anne Kirste Aikio, oahppamateriálačálli Petra Kuuva, giellabeassejođiheaddji Niina Aikio-Siltala ja gáiddusoahpahusa pilohtaprošeavtta koordináhtor Anne Olli. Oahpahus- ja kulturministeriijas barggu jođiha kansliijahoavda Anita Lehikoinen. Su bargojoavkkus ledje oahpahusráđđeaddi Jari Rajanen, oahpahusráđđeaddi Marjo Vesalainen, oahpahusráđđeaddi Kirsi Alila, earenoamášplánejeaddji Mikko Cortés-Tèllez ja earenoamášáššedovdi Sini Keinonen.

Ovddidanbargojoavku barggai viiddes čielggadeami sámegielaid ja sámegielat oahpahusa dilis. Bargojoavku geahčadii sámegielat árrabajásgeassima, sámi kultuvra- ja giellabeassedoaimma, sámeoahpahusa ja -skuvlejumi dili ollislaččat. Bargojoavku almmustahtii jagis 2020 raportta, mas ledje doaibmabidjoevttohusat dili buorideapmái.

Barggu áigge dahkkojuvvoje maid njeallje sierračielggadeami, oahpahus- ja árrabajásgeassima bargiid oažžumis  ja skuvlenbálgáin, sosiála- ja dearvvasvuođasuorggi bargoveaga skuvlejumi dilis ja sámegielat oahppamateriálaid dilis ja dárbbuin. Lassin dahkkui čielggadus sápmelašdieđus oahppomateriálain.

Sámedikki ságadoalli sadjásaš, skuvlen- ja oahppamateriálasektora ovddasvástádusságadoalli Tuomas Aslak Juuso ja oahpahus- ja kulturministeriija kansliijahoavda Anita Lehikoinen soabaiga deaivvadeamis juovlamánus 2024, ahte álggahuvvo ovddidanbargojoavkku doaibmabidjoevttohusaid kártenbargu, man ulbmilin lea álggahit aktiivvalaš barggu doaibmabidjoevttohusaid ollašuhttima várás.

• Opetus- ja kulttuuriministeriön julkaisuja 2021:25, Saamen kielten ja saamenkielisen opetuksen kehittämistyöryhmän raportti

 Lassidieđut

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi

Bigga-Helena Magga
Skuvlenčálli
040 570 2786 / 010 839 3121
bigga-helena.magga@samediggi.fi