Sámediggi oassálastá Sápmelaččat girkus -prošeavtta loahppaipmilbálvalussii Turkus
Suoma evangelalaš-luteralaš girku ordne Sämmiliih kirhoost – Sä’mmla ceerkvest – Sápmelaččat girkus – Saamelaiset kirkossa -prošeavtta loahppaipmilbálvalusa Turku duopmogirkus duorastaga miessemánu 8. beaivve dmu 19. Sámedikki ságajođiheaddjijoavku oassálastá dilálašvuhtii.
Sámi girkobeaivvit ordnejuvvojedje Anáris 5.-7.8.2022 ja fáddán lei Bassi Dolla - Bassi Álbmot.
Guovttejahkásaš Sämmiliih kirhoost – Sä’mmla ceerkvest – Sápmelaččat girkus –prošeavtta lea organiseren Suoma evangelalaš-luteralaš girku bismmaidčoahkkin ja dan mihttomearrin lea leamaš burgit máŧolaš ruossalasvuođaid sápmelaččaid ja girku gaskkas. Dál prošeakta ožžojuvvo lohppii ipmilbálvalusas, mii lágiduvvo Turku duopmogirkus, ja mii sisttisdoallá gáhtamuša ja soabadeami ovdanbuktima sápmelaččaid ektui.
– Sápmelaččain ja evangelalaš-luteralaš girkus lea guhkes ja girjás historjá. Munnje lea dehálaš, ahte mii leat báikki alde čájeheamen gudnejahttima dán dáhpáhussii. Juohke sápmelaččas lea máŧolašvuohta vuostáiváldit gáhtamuša ja soabadeami, man girku ovdanbuktá, iežas vuolggasajiin, dadjá ságajođiheaddji sadjásaš Tuomas Aslak Juuso.
Sámedikki ságajođiheaddji sadjásačča lassin ipmilbálvalussii oassálastet I várreságajođiheaddji Leo Aikio ja ságajođiheaddji veahkkebargi Niina Siivikko. Sámedikki lahtut Tauno Ljetoff ja Ulla-Maarit Magga leaba doaibman prošeavtta stivrenjoavkkus, man bismmaidčoahkkin lea nammadan.
– Lei stuorra gudni oažžut leat fárus prošeavtta stivrenjoavkkus ja antologiijabarggus. Mátkki alde lei illu fuopmášit, man láhkai dát prošeakta lea ožžon giitosiid ja gudnejahttima olles girkus. Sávvamis boahttevuođas sámit sáhtášedje leat girku ovttaveardásaš lahtut iežaset vuolggasajiin. Sávan maiddái, ahte dát prošeakta ja otná ipmilbálvalus dahket oasisteaset máŧolažžan maiddái ándagassii addojumi, gávnnaha Tauno Ljetoff.
Sámedikki čoahkkin oaččui diehtun Sápmelaččat girkus -prošeavtta áigeguovdilis áššiid cuoŋománu 14. beaivve 2025. Čoahkkin gulai áššedovdin prošeaktakoordináhtor Mari Valjakka ja sámebarggu čálli Erva Niittyvuopio.
Prošeavtta loahppadilálašvuođat ordnejuvvojedje Heahtás 23.3.2025 ja Anáris 24.3.2025. Sámiid ruovttuguovllu searvegottit leat ordnen sáhtu loahppaipmilbálvalussii, mii ordnejuvvo Turku duopmogirkus.
Ipmilbálvalus lea rabas buohkaide ja dan sáhttá čuovvut virtuálagirku bakte: https://www.virtuaalikirkko.fi/kirkko/turun-tuomiokirkko/2025-05-08-6h4o12tto
Loga lasi Sápmelaččat girkus -prošeavttas: https://evl.fi/plus/paatoksenteko/piispainkokous/saamelaiset-kirkossa/
Lassidieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Leo Aikio
I várreságajođiheaddji
040 621 6505
leo.aikio@samediggi.fi
