Ulla-Maarit Magga válljejuvvui Sámedikki stivrra aitosaš lahttun
Sámedikki čoahkkin válljii ovttamielalaččat Sámedikki stivrra viđat aitosaš lahttun Ulla-Maarit Magga ja vuosttas várrelahttun Nilla Tapiola ja nubbin várrelahttun Armi Palonoja. Čoahkkimis sáttaságastallojuvvui maiddái riikkaidgaskasaš doaimma guoski strategiija beaivideamis.
Sámediggi 1.9.2024 - 31.12.2027. Govva: Ville Fofonoff
Sámediggeláhkaođastusa mielde Sámedikki stivrra čoakkádussii lasihuvvojit okta aitosaš lahttu ja guokte várrelahtu. Ođastuvvon Sámediggelága (414/2025) 13 § mielde Sámediggi vállje gaskavuođastis stivrra, mas lea ságajođiheaddji, guokte várreságajođiheaddji ja eanemustá vihtta eará lahtu. Dasa lassin Sámediggi vállje gaskavuođastis stivrii guokte várrelahtu.
Riikkaidgaskasaš doaimma guoski strategiija beaivideapmi ovdána
Čoahkkimis sáttaságastallojuvvui maiddái riikkaidgaskasaš doaimma guoski strategiija beaivideamis. Sámedikki doaibmaplána ja bušeahta 2025 mielde strategiija beaividuvvo vástidit válgabaji 1.9.2024 – 31.12.2027 doaibmaprográmma ulbmiliid ja riikkaidgaskasaš arenain dáhpáhuvvan ovdáneami.
Strategiija beaivideami dárkkuhussan lea nannet Sámedikki vejolašvuođaid oassálastit ja váikkuhit riikkaidgaskasaš ovttasbargoforumiin, ovddidit sápmelaččaid vuoigatvuođaid ja ovdanbuktit eamiálbmoga oaidninčiegaid globála gažaldagain. Sáttaságastallama vuođul válmmaštallojuvvo evttohus beaividuvvon strategiijas, mas Sámedikki čoahkkin maŋŋá mearrida.
Lahttonammadeamit čoahkkimis
Sámedikki čoahkkin nammadii čuovvovaš olbmuid:
- Nuoraidráđđi: Ellen Saijets válljejuvvui Saana Aikio sadjái loahppabadjái.
- Válgalávdegoddi: Aimo Aikio válljejuvvui Pirjo Lotvosa sadjái.
- Sámi Giellagáldu: Neeta Jääskö válljejuvvui Sámi Giellagáldu stivrii Terhi Harju sadjái dálá njealji jagi doaibmabaji lohppii. Dasa lassin válljejuvvui Nilla Tapiola várrelahttun Vesa Orassalo, gean sadjái Neeta Jääskö lei árabut nammaduvvon.
Sámedikki čoahkkin 4/2025 dollojuvvui 29.9.2025 Sajosis Anáris ja gáiddusoktavuođaid bokte. Čoahkkima beavdegirji almmustahttojuvvo Sámedikki neahttasiidduin maŋimustá guovtti vahku geažes čoahkkima doallamis.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Pia Ruotsala-Kangasniemi
Hálddahushoavda
040 726 2688 / 010 839 3106
pia.ruotsala@samediggi.fi
Johanna Alatorvinen
Dieđihančálli
040 663 4493 / 010 839 3140
johanna.alatorvinen@samediggi.fi
