Dieđiheapmi sámegielaid gáiddusoahpahusa pilohttaprošeavtta boahttevaš lohkanjahkái lea dál jođus - dieđit oahppi mielde oahpahussii!

Govva: Studio Borga/Sámediggi

Sámegielaid gáiddusoahpahusa pilohttaprošeakta lea Ohcejoga gieldda ja Sámedikki ovttasbargoprošeakta, mii lea jagis 2018 álgán. Lohkanjagi 2025–2026 áigge prošeavttas stuđerejit measta 200 oahppi 122 skuvllas ja 46 gielddas. Dán lohkanjagi áigge gáiddusoahpahusprošeavttas lea váldon atnui neahttaloganii vuođđuduvvi neahttaoahppanbiras Itslearning. Oahppodiimmuide oassálastojuvvo Itslearning bokte ja oahppiid fuolaheaddjit besset čuovvut, mii oahppodiimmuid áigge lea dahkkon ja leatgo boahtán leavssut. Dál Itslearning geavahuvvo vuosttas háve maiddái oahpahussii dieđiheapmái árabut geavahuvvon Hellewi-vuogádaga sajis. Dieđiheapmi guoská oahppiid ja stuđeanttaid, geat sihke álggahit ja jotket oahpahusas.

Mii oahpahus ja geasa?

Gáiddusoahpahusprošeakta fállá sámegiela (anáraš-, nuortalaš- dahje davvisámegiela) vuođđooahpahusa dahje logahatskuvlejumi dievasmahtti sámegiela oahpahusa 2 diimmu vahkus. Maiddái ovdaoahpahusa oahppit sáhttet searvat prošeavtta oahpahussii. Ovda- ja vuođđoskuvlalaččat oassálastet oahpahussii iežaset skuvllas, ja skuvla galgá ordnet gáiddusoahppái bagadalli. Bagadalli vástida dorvvolaš ja ráfálaš stuđerenbirrasis oahppodiimmuid áigge ja teknihkalaš váttisvuođaid čoavdimis, go dat bohtet.

Oahpahus lea oaivvilduvvon sápmelaš oahppiide ja stuđeanttaide, geat ásset sámiid ruovttuguovllu gielddaid olggobealde ja geaid bearraša dahje soga giella lea muhtun Suomas hállojuvvon sámegielain (anárašgiella, nuortalašgiella dahje davvisámegiella). Sámegiela ii dárbbaš máhttit ovddežis vai sáhttá oassálastit oahpahussii. Prošeakta ii fála oahpahusa rávesolbmuide.

Gii sáhttá dieđihit?

Almmuheami sáhttá dahkat fuolaheaddji, oahpahusa ordnejeaddji, rektor dahje nuppi dási stuđeanta. Go fuolaheaddji dieđiha, mii sávvat ahte fuolaheaddji váldá juo ovddalgihtii oktavuođa oahppi skuvlii, ja muitala ahte oahppi háliida ja sus lea vejolašvuohta beassat oassálastit sámegielaid gáiddusoahpahusa pilohttaprošektii.

Dieđiheami maŋŋá?

Dieđihanáiggi nohkama maŋŋá prošeakta váldá oktavuođa oahppi ruoktogildii. Dan maŋŋá álgá oahpahusjoavkkuid ja sámegiela oahpahusa lohkanortnega plánen ovttasráđiid skuvllaiguin. Oahpahusjoavkkut hábmejuvvojit juohke sámegillii sierra, nu ahte oahppiid ahke- ja gielladássi, lohkanortnet ja skuvlasáhtut vuhtiiváldojit nu bures go vejolaš. Oahpahus lágiduvvo gielain ja joavkkuin, main leat unnimustá guokte oahppi dahje stuđeantta. Lohkanortnetbargu dahkko cuoŋománu rájes gitta geassemánu lohppii. Dávjá lohkanortnegiidda bohtet nuppástusat vel borgemánus. Oahpahusa áiggiin ja diimmuide searvama rávvagiin addojuvvojit dieđut skuvllaide ja ruovttuide borgemánus. Gáiddusoahpahusprošeavtta čakčalohkanbadji álgá 17.8.2026.

Amma vuhtiiválddát, ahte muhtun gávpogat Helsset, Oulu ja Roavvenjárga) ordnejit davvisámegiela oahpahusa lagašoahpahussan. Jos háliidat oahpahussii, váldde oktavuođa iežat skuvlla rektorii dahje gávpoga skuvlii!

Dieđit oahppi oahpahussii: https://www.saamenetaopetus.com/ilmoittautumisohjeet

Boahttevaš dáhpáhusat sámegielaid gáiddusoahpahusas beroštuvvan olbmuide

Infodilálašvuohta gáiddusoahpahusas beroštuvvan fuolaheaddjiide

Maŋŋebárgga 24.3.2026 dii. 17:30–18:30

Searvanliŋka: https://teams.microsoft.com/meet/31685160188036?p=y4aVDKnSPhtJLb3LJ1

Buresboahtin mielde sámegielaid gáiddusoahpahussii!

Lassedieđut

Laura Njunnas, prošeaktahoavda
Ohcejoga gielda
laura.njunnas@edu.utsjoki.fi
040 701 2094

Anne Olli, prošeaktakoordináhtor
Sámediggi
anne.olli@samediggi.fi
040 687 5989

https://www.saamenetaopetus.com/