Duodji Akademiija 2027 -prošeakta álgá - prošeaktaplánejeaddjin lea álggahan Birit Tornensis
Duodji Akademiija 2027 -prošeavtta váldoulbmilin lea bajásdoallat ja ovddidit sámi duodjemáhtu sámeservošis. Prošeakta ordne bargobádjesemináraid Eanodagas, Norgga Guovdageainnus ja maid Ruoŧa bealde Gárasavvonis. Bargobádjeseminárain lea fáddán ee. árbedieđu gaskkusteapmi buolvvas nubbái.
Govva: Reetta Tornensis.
Prošeavtta plánejeaddjin lea čakčamánus 2025 álggahan Gárena-Biera Biera Juha Biret, Birit Tornensis. Tornensis lea eret Eanodaga Gilbbesjávrris ja son ráhkista duddjoma. Sus lea humanisttalaš diehtagiid kandidáhta ja buohccedikšára skuvlejupmi. Son lea maiddái stuđeren sámeduoji sámiid oahpahusguovddážis Johkamohkis Ruoŧas. Tornensis bargá gáiddusin Gilbbesjávrris.
– Álggahan bargguid movttegis mielain. Prošeavtta fáddá lea hui dehálaš ja munnje earenoamáš miellagiddevaš, go ieš lean maiddái duojár. Lea somá buori joavkkus beassat bargat dáinna fáttáin, dadjá Tornensis.
Duodji Akademiija 2027 -prošeavtta mihttomearrin lea nannet árbevirolaš sámeduoji máhtu ja sajádaga, dorvvastit árbevirolaš dieđu ja dáidduid sirdáseami nuoraide ja maid buoridit oahppamateriálaid ja digitála reaidduid oažžuma. Dasa lassin prošeakta figgá ovddidit sámeduoji gánnáhahtti ja suvdilis ekonomalaš ealáhussan. Prošeavttas ráhkaduvvo doaibmaplána sámeduoji buvttadeami, vuovdima ja geavahusa guoski ehtalaš rávvagiid ráhkadeamis.
Prošeavtta doaibma deattuha árbedieđu sirdima ealáskahttima ja nannema lunddolaš birrasis. Prošeavtta bargobádjeseminárat fállet ee. nuoraide, duojáriidda, servviide ja organisašuvnnaide vejolašvuođaid stuđeret duodjedáidduid, juohkit jurdagiid ja ságastallat sámeduoji boahttevuođas. Seamma áigge prošeakta doarju rájáid rasttildeaddji ovttasbarggu Norgga ja Ruoŧa sámeduodjeinstitušuvnnaiguin ja sámeduojáriiguin seammásgo nanne sosiála oktiigullevašvuođa ja kultuvrralaš identitehta ja maid sámegiela.
Prošeakta ollašuhtto Suoma ja Norgga Sámedikkiid ovttasbargun, ja dan ruhtada EU Interreg Aurora -prográmma. Álbmotlaš vásttaruhtadeapmi lea ohccojuvvon Lapin lihtus. Prošeakta joatkašuvvá jagi 2027 lohppii.
Lassedieđut:
Birit Tornensis
Plánejeaddji, Duodji Akademiija 2027 -prošeakta
040 545 7740
birit.tornensis@samediggi.fi
