Sámediggi ja Dearvvasvuođa ja buresveadjima lágádus nannejit ain ovttasbarggu – jagi 2026 váldodeattut leat válljejuvvon

Ovttasbargoráđđádallamat gullet THL ja Sámedikki jagis 2023 vuolláičállán ovttasbargosoahpamuššii ja dan ollašuhttimii. Ovttasbarggu ulbmilin lea ovddidit Suoma sámeálbmoga dearvvasvuođa ja buresveadjima, earret eará dan láhkai, ahte buvttaduvvo diehtu Suoma sámeálbmoga dearvvasvuođa, buresveadjima ja árgga dorvvu dilis.

”Lean duđavaš, ahte THL lea maŋimuš jagiid áigge čatnašuvvan nannosabbotgo ovdal ovddidit sámiid dearvvasvuhtii ja buresveadjimii gullevaš gažaldagaid. Oainnán ovttasbarggu ovdáneami positiivvalažžan, ja mii háliidit joatkit dákkár nana ja ovddideaddji guoibmevuođa”, dadjá Sámedikki ságajođiheaddji sadjásaš Tuomas Aslak Juuso.

”Mii háliidit figgat iežamet bealis ovddidit Suoma sámeálbmoga buresveadjima, dearvvasvuođa ja dorvvolašvuođa, nu ahte dovdát ja dovddastit sámiid sierrasajádaga eamiálbmogin. Mii leat huksen ovttas luohttámuša, ráhkadan searvvušstruktuvrraid ja ovddidan sámeáššiid oinnolašvuođa. Mis lea mihttomearrin nannet THL máhtu buvttadit boahtteáiggis dutkamuša ja dieđu, mii vuhtiiváldá Suoma sámeálbmoga ja gudnejahttá eamiálbmogiid vuoigatvuođaid.”, dadjá THL oaivehoavda Mika Salminen.

Čoahkkimis gieđahallojuvvojedje jagi 2025 lihkostuvvamat ja hástalusat ja ságastallojuvvui áigeguovdilis gažaldagain, dego Duohtavuohta- ja soabadankomišuvnna barggus, Sámediggelága ođastusas ja eamiálbmotdutkamuša dutkanehtalaš rávvagiid ovddideamis.

Dán jagi ovttasbarggu váldodeaddun válljejuvvojedje čuovvovaš temát:

• THL ja Sámediggi nannejit ovttasbarggu struktuvrraid dan láhkai, ahte vuođđudit Sámeáššiid guoibmeráđi. Dat lea ovttasbargofierpmádat, man guovddážis lea sámiid ja dearvvasvuođa ja buresveadjima deaivvadanbáiki. Guoibmeráđđi doaibmá šaldin ja ságastallama huksejeaddjin sierra doibmiid gaskkas. Mielde nammaduvvojit eiseváldeoassebealit, dutkanásahusat ja searvvit.
• THL ovddida iežas sámegielat materiálaid, vai materiálat livčče olámuttos ja vuhtiiválddáše kultuvrra ja daid buvttadeapmi livčče buorebut koordinerejuvvon.
• THL lasiha sámegiel- ja kulturmáhtu bargiid gaskavuođas ja nanne máhtu eamiálbmogiid vuoigatvuođaid sierragažaldagain.
• Dutkan- ja ovddidandoaimmas váldojuvvojit konkrehta lávkkit sámiid dutkanehtalaš prinsihpaid laktima guvlui THL doibmii.

Čoahkkimii oassálaste Sámedikki ságajođiheaddji sadjásaš Tuomas Aslak Juuso, sosiála- ja dearvvasvuođalávdegotti ságajođiheaddji Leena Niittyvuopio-Jämsä, vs. sosiála- ja dearvvasvuođačálli Anni Koivisto ja sosiála- ja dearvvasvuođačálli Riitta Lehtola-Kosonen ja gielladorvočálli Anne Kirste Aikio.

THL:s oassálaste oaivehoavda Mika Salminen, sode-ossodaga jođiheaddji Piia Aarnisalo, bálvalanvuogádat-ossodaga hoavda Anu Niemi, kultuvrralaš máŋggahámatvuohta -joavkku joavkohoavda ja dutkanhoavda Hannamaria Kuusio,  dutkanprofessor Anu Castaneda, ovddidanhoavda Saida Mäki-Penttilä ja plánejeaddjit Niila Rahko ja Maria Nousiainen.

Lassedieđut:

Tuomas Aslak Juuso
Sámediggi
ságajođiheaddji sadjásaš
tel. 040 687 3394
tuomas.juuso(at)samediggi.fi

Hannamaria Kuusio
THL
joavkohoavda, dutkanhoavda
tel. 029 524 7657
ovdanamma.sohkanamma@thl.fi