Várreságajođiheaddji Aikio: “Boazovahátlága galgá ođasmahttit, iige vuordit boazojámuid”
Sámediggi deaivvadii eana- ja meahccedoalloministeriija ovddasteaddjiiguin njukčamánu 13. beaivve Helssegis heahtedili geažil, maid eatnamiid jiekŋun lea dagahan. Eana- ja meahccedoalloministeriija ii álggat boazovahátlágas dárkkuhuvvon čielggadusa dahkama guohtoneatnamiid dilis.
Dálkkit, mat molsašuddet arvviin buollašiidda, leat jiekŋudan eatnama nu, ahte boazu ii bastte guohtut alcces biepmu. Govva: Asko Länsman, Gáldooaivvi bálggus.
Eana- ja meahccedoalloministeriija dagai 13.3.2025 mearrádusa, ahte ii álggat boazovahátlága mieldásaš čielggadanbarggu. Ministeriija oaivvilda, ahte roasu čielggadeapmái eai leat doarvái vuođustallon sivat. Ministeriija mielde ii leat jođus dakkár vuorddekeahtes roassu, mii deavdá boazojápmomeroštallama, ja mii uhkidivčče boazodoalu joatkašuvvama.
Sámedikki I várreságajođiheaddji Leo Aikio lea beahttašuvvan eana- ja meahccedoalloministeriija mearrádussii. – Suoma láhkaásaheami galgá ođasmahttit nu, ahte spiehkastatdilis veahki oažžu ovddalgihtii, iige easkka boazojámuid maŋŋá. Dálá dilli, mas vurdojuvvojit dieđut boazojámuid mearis čavčča rádjai, lea jierpmeheapme ja maiddái divrasut, go rivttesáigásaš veahkki heahtebiebmamii, muitala Aikio.
Sámebálgosat leat bivdán 4.3.2025, ahte eana- ja meahccedoalloministeriija álggaha boazovahátlága ollašuhttima. Sámiid ruovttuguovllus bohccot eai bastte guohtut dábálaš guohtoneatnamiid daid jiekŋuma ja guohppuma, eaige garra jiekŋagerddiid, mat leat muohttagis, geažil. Dálkkit, mat molsašuddet arvviin buollašiidda, leat jiekŋudan eatnama nu, ahte boazu ii bastte guohtut alcces biepmu.
Dilli lea dagahan bohccuid bieđggisteami viidát ja maiddái heahte- ja lassibiebmama dárbbu. Seammalágan dilli lea maiddái Norggas ja Ruoŧas ja stáhtat leat álggahan dalán doaimmaid boazodoalu doarjuma várás.
Spirebuhtadusat eai máksojuvvo dievasmearálaččat
Sámedikki ja eana- ja meahccedoalloministeriija deaivvadeamis ságastallui maiddái spirebuhtadusain. Stáhta čavga ekonomalaš dilli čuohcá maiddái spirebuhtadusaide nu, ahte dat eai máksojuvvo dievasmearálaččat.
– Spirebuhtadusaid čuohppan lea vuot ođđa táhpa boazodoalliide, geaid ekonomalaš dilli lea jo ovddežis hui heittot goavvedálvviid vahágiid geažil. Bohccot gullet opmodatsuoji biirii ja dasa čuohcci vahágiin galgá oažžut dievas buhtadusa. Stáhta stivre spirenáliid ja lea stáhta bargu maiddái buhttet bohccuid, maid beađut leat goddán, dadjá várreságajođiheaddji Aikio.
Deaivvadeapmái oassálaste I várreságajođiheaddji Leo Aikio lassin Sámedikki ealáhus- ja birasláhkačálli Sarita Kämäräinen ja vs. ealáhusčálli Maria Valkeapää.
Lassidieđut:
Leo Aikio
I várreságajođiheaddji
040 621 6505
leo.aikio@samediggi.fi
Sarita Kämäräinen
ealáhus- ja birasláhkačálli
040 186 7258
sarita.kamarainen@samediggi.fi
Maria Valkeapää
vs. ealáhusčálli
040 530 9513
maria.valkeapaa@samediggi.fi
