Diehtu lassečielggademiin, maid Sámedikki válgalávdegoddi lea bivdán jagi 2027 válgalogahallamii merkema várás

Láhka Sámedikkis ođasmuvai jagis 2025 ja ođasmahtton láhkačuoggát (414/2025) bohte fápmui 1.8.2025. Ođasmahttima dihtii Sámedikki válgalávdegoddi galgá lága mielde dárkkistit buot jagi 2024 válgalogahallamii merkejuvvon olbmuid válgalogahallamii lasiheami eavttuid. Ođasmahttojuvvon ja dál fámus leahkki sámediggelága mielde Sámedikki jagi 2027 válgalogahallamii merkema eaktun lea jagis 2026 dát:

3 § (27.6.2025/414)

Vuoigatvuohta šaddat merkejuvvot válgalogahallamii

Vuoigatvuohta šaddat merkejuvvot válgalogahallamii lea olbmos, guhte atná iežas sápmelažžan, dainna eavttuin, ahte:

1. olmmoš ieš dehe aŋkke okta su váhnemiin, áhkuin ja ádjáin dehe máttaráhkuin ja -ádjáin lea oahppan sámegiela vuosttaš giellanis.

Dat ahte olmmoš lea merkejuvvon ovddit válgalogahallamii ii njuolga oaivvil dan, ahte su galggašii merket maiddái jagi 2027 válgalogahallamii. Válgalávdegoddi dárkkista lága mielde buot jagi 2024 válgalogahallamii merkejuvvon olbmuid buohta, devdetgo sii dálá lága eavttuid. Olbmuide, geaid buohta válgalávdegoddi ii leat sáhttán nannet ng. giellakriteara ollašuvvama, leat sádden lassečielggadanbivdda.

Lassečielggadanbivdaga ožžon olbmos lea vejolašvuohta doaimmahit luohtehahtti čielggadeami ng. giellakriteara ollašuvvamis ovdal go mearriduvvo, merkejuvvogo son jagi 2027 válgalogahallamii. Jus bivdojuvvon lassečielggadeapmi ii doaimmahuvvo mearreáiggis, lágas gáibiduvvon giellakriteara ollašuvvan árvvoštallo daid materiálaid vuođul, mat gávdnojit.

Lassedieđut:

Sámedikki válgalávdegoddi
Sámekulturguovddáš Sajos
vaalit(at)samediggi.fi