Nuoraidráđi lahtut leat válljejuvvon doaibmabadjái 2026-2027
Sámedikki čoahkkin lea válljen nuoraidráđi lahtuid doaibmabádjái 2026-2027. Sámedikki čoahkkin vállje nuoraidráđđái guovtti jahkái hávil čieža lahtu ja juohke oktii persovnnalaš várrelahtu.
Nuoraidráđi aitosaš lahttun válljejuvvojedje Sárá-Márjá Keskitalo, Ellen Saijets, Rosa-Máren Juuso, Ainomaija Mäenpää, Vesa Orassalo, Niila-Juhán Valkeapää, Mihku Näkkäläjärvi
Várrelahttun válljejuvvojedje Tiia-Káren Alakorva, Áron Korpi, Lars-Tuomas Valkeapää, Hilda Musta, Lilja Ljetoff, Elle Raudasoja, Hans Ravna-Pieski
Nuoraidráđđi válljii gaskavuođastis ságajođiheaddjin Sárá-Márjá Keskitalo ja várreságajođiheaddjin Ellen Saijets. Nuoraidráđđi vállje áššedovdilahtuid čuovvovaš čoahkkimis miessemánus.
Sárá-Márjá Keskitalo, Ellen Saijets
Nuoraidráđi bargguide gullet:
- Movttiidahttit sámenuoraid oassálastit servodatlaš doibmii,
- ovddidit sámenuoraid álbmotlaš ja riikkaidgaskasaš ovttasbarggu,
- bargat ovttasbarggu nuoraid áššiid dikšu álbmotlaš ja riikkaidgaskasaš organisašuvnnaiguin ja doaibmaorgánaiguin,
- vástidit nuoraidráđi oktavuođas iehčanasat doaibmi sierra Sámenuoraid konfereanssa lágideamis guovtti jagi gaskkaid.
Nuoraidráđi doaimma ruhtada oahpahus- ja kulturministeriija. Doaibmabajis 2026-2027 nuoraidráđđi bargá erenomážit sámegielat ja sámekultuvrii heivehuvvon nuoraidbarggu ovddideami ovdii.
Lahtuid válljen
Sámedikki čoahkkin vállje nuoraidráđđái guovtti jahkái hávil čieža lahtu ja juohke oktii persovnnalaš várrelahtu. Nuoraidráđđi vállje gaskavuođastis ráđđái guovtti jahkái hávil ságajođiheaddji ja várreságajođiheaddji. Ráđi lahtut galget válljejumi áigge leat 18–28-jahkásaččat. Dasa lassin nuoraidráđđái válljejuvvojit guovtti jahkái hávil eanemustá vihtta fásta áššedovdilahtu, geat galget leat válljedettiin 15-17-jahkásaččat. Nuoraidráđi ságajođiheaddji ja várreságajođiheaddji eaba dárbbaš leat Sámedikki lahtut.
Nuoraidráđis sáhttá leat iežas doaimma várás okta dahje eanet vuollejuhkosat. Nuoraidráđđi ásaha mearreáigái vuollejuhkosiid ja nammada juhkosii lahttun 15–28-jahkásaš sámenuoraid.
Nuoraidráđi ja ráđi áššedovdit galget ovddastit nu bures go vejolaš Suoma sámiid giella- ja guovllujoavkkuid.
Lassedieđut:
Saana Aikio
vs. Nuoraidčálli
044 494 6200
saana.aikio@samediggi.fi
