Sámediggi ja Digi- ja álbmotdiehtodoaimmahat nannejit ovttasbarggu: Suomi.fi bagada boahtteáiggis buorebut sámegielat bálvalusaide
Sámedikki ja Digi- ja álbmotdiehtodoaimmahaga (DVV) ovddasteaddjit deaivvadedje Anáris borgemánu loahpas. Deaivvadeami fáddán lei hukset jeavddalaš ovttasbarggu ja ságastallat sámi giellalága ollašuvvamis DVV bálvalusain.
Suomi.fi-siidduide ráhkaduvvo sámegielat bálvalusaid ohcansiidu
Sámedikki, DVV ja Mii ovttas -fierpmádaga ovddit ságastallamiid vuođul DVV lei jo plánegoahtán Suomi.fi-siidduide ohcansiiddu anáraš-, nuortalaš- ja davvisámegielat bálvalusain. Ohcansiiddu lea ulbmil almmustahttit jagi 2026 áigge.
Suomi.fi lea DVV hálddašan ohcansiidu, mii veahkeha ja oahpista olbmuid ja fitnodagaid dikšut árgabeaivvi áššiid virgeoapmahaččaiguin ja almmolaččat ávkkálaš organisašuvnnaiguin. Ođđa bálvalusaid ohcansiiddu sávvet álkidahttit sápmelaččaid vejolašvuođa gávdnat dieđu iešguđet virgeoapmahaččaid sámegielat bálvalusain, nu ahte dat leat čohkkejuvvon ovtta sadjái ja maiddái lasihit sámegielat bálvalusaid geavaheami.
Jeavddalaš deaivvadeamit boahtteáiggis
Deaivvadeamis sohppojuvvui maiddái Sámedikki ja DVV gaskasaš ovttasbarggu nanosmahttimis ja jahkásaš deaivvademiin. Sámediggi lea ovdal soahpan fásta ovttasbarggus Kelain ja THL:ain.
– Mii válddiimet iluin vuostá DVV almmuhusa sámegielat bálvalusaid ohcansiiddus, mii boahtá Suomi.fi neahttabálvalussii. Dat konkrehta doaibma hukse nana jáhku ovttasbargui ja dasa ahte DVV:s lea dáhttu ovddidit sámegielat bálvalusaid. Sámediggi ávžžuha eiseválddiid ráhkkanit dahkat sámegillii govvádusaid sin sámegielat bálvalusain bálvalusdiehtovuorkái, dadjá Sámedikki ságajođiheaddji sadjásaš Tuomas Aslak Juuso.
– Suomi.fi lea hui vuogas báiki čohkket dieđuid sámegielat bálvalusain. Almmolaš hálddahusa sámegielat bálvalusaid ovdanbuktimiid ja govvádusaid lea boahtteáiggis álkit gávdnat go dat leat čohkkejuvvon. Mii boahtit maiddái viiddidit DVV iežas sámegielat bálvalusaid govvádusaid meari, muitala bajit hoavda Timo Salovaara Digi- ja álbmotdiehtodoaimmahagas.
Deaivvadeapmái oassálaste Digi- ja álbmotdiehtodoaimmahagas oaivehoavda Janne Viskari, bajit hoavddat Timo Salovaara, Pekka Rehn ja Noora Kallio ja diehtojuohkin- ja márkanfievrridanhoavda Anna-Riitta Lund. Sámedikki bealis mielde ledje ságajođiheaddji sadjásaš Tuomas Aslak Juuso, gielladorvočálli Anne Kirste Aikio ja giellaáššiidčálli Marko Marjomaa.
Digi- ja álbmotdiehtodoaimmahat ovddida servodaga digitaliserema, dorvvasta dieđuid oažžuma ja fállá bálvalusaid áššehasaid eallima dáhpáhusaide. Dat fuolaha servodaga vuođđun leahkki álbmotdiehtovuogádaga bajásdoallamis. Sámi giellaláhka guoská doaimmahaga ja sámiin lea riekti geavahit sámegiela divššodettiin áššiid.
Sámediggi lea sámiid virggálaš ovddasteaddji. Dat ráhkada sámiid virggálaš oainnu ja ráđđádallá eiseválddiiguin. Sámediggi doalaha ja ovddida buot golbma Suomas ealli sámegiela, buot sámiid árbevirolaš ealáhusaid sihke sámekultuvrra ja eallinvuogi.
Lassidieđut:
Ságajođiheaddji sadjásaš Tuomas Aslak Juuso, Sámediggi
Bajit hoavda Timo Salovaara, Digi- ja álbmotdiehtodoaimmahat
