Sámediggi lea oassálastan aktiivvalaččat vuođđoláhkaváljagotti gullamiidda sámediggeláhkaevttohusas

Sámediggi lea oassálastán álgojagi áigge vuođđoláhkaváljagotti buot guđa áššedovdigullamii, mat guske sámediggeláhkaevttohusa, ja oassálastá vel boahttevaš gullamiidda njukčamánu 21. ja 25. beaivve.

Govva: Sarita Kämäräinen

Vuođđoláhkaváljagoddi lea joatkán sámediggeláhkaevttohusa guoski áššedovdigullamiid guovva- ja njukčamánu áigge. Dálá dieđu mielde maŋimuš áššedovdigullan lea disttaga njukčamánu 25. beaivve.

– Stáđásman vuogi mielde mii leat addán vuođđoláhkaváljagoddái bargoráfi sámediggeláhkaevttohusa gieđahallamii, eatge mii kommentere gaskan áššiid almmolaččat. Sávaldahkan lea, ahte láhkaevttohusa gieđahallan riikkabeivviin válbmana giđđačoahkkinbaji áigge, dadjá ságajođiheaddji sadjásaš Tuomas Aslak Juuso.

Sámedikkis gullamiidda leat oassálastán ságajođiheaddji sadjásaš Tuomas Aslak Juuso, I várreságajođiheaddji Leo Aikio, láhkačálli Kalle Varis ja ealáhus- ja birasláhkačálli Sarita Kämäräinen.

Sámediggeláhkaevttohus lea stáhtaministtar Petteri Orpo ráđđehusprográmmas. Ášši sáddejuvvui vuođđoláhkaváljagoddái 14.2.2024, masa eana- ja meahccedoallováljagoddi, ekonomiijaváljagoddi ja bargo- ja dásseárvováljagoddi galget addit iežaset cealkámuša láhkaevttohusas. Sámediggi lea oassálastán álgojagi áigge maiddái ekonomiijaváljagotti ja eana- ja meahccedoallováljagotti áššedovdigullamiidda.

Vuođđoláhkaváljagoddi ordnii almmolaš gullama sámediggelága ođasmahttimis 17.10.2024. Gullama sáhttá geahččat neahttavurkkohussan čujuhusas https://verkkolahetys.eduskunta.fi/fi/.

Ášši gieđahallandieđut riikkabeivviin: https://www.eduskunta.fi/FI/vaski/KasittelytiedotValtiopaivaasia/Sivut/HE_100+2023.aspx

Lassidieđut:

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi

Leo Aikio
I várreságajođiheaddji
040 621 6505
leo.aikio@samediggi.fi


Juoge siiddu ovddosguvlui

Eará ođđasat