Sámenuoraid konferánsa ordnejuvvo Anáris 14.-15.8.2025
Konferánssa fáddán lea árbevirolaš diehtu ja dan lahkonit servoša resurssa geahččanguovllus. Konferánssas gullat Sámedikki ságadoalli sadjásaš Tuomas Aslak Juuso, Nuoraidráđi várreságadoalli Niila-Juhán Valkeapää, musihkkapedagoga ja juoigi Laura Tapiola sáhkavuoru sihke lihkadeami-, valástallan- ja nuoraidministtar Mika Poutala videodearvvuođaid. Prográmmas leat sáhkavuoruid lassin vejolaš oassálastit bargobájiide.
Govva: Ville Fofonoff / Sámedikki nuoraidráđđi
-Mii leat čohkken prográmmii sáhkavuoruid lassin miellagiddevaš bargobájiid ja leat bargobájiid oasil bargan ovttas earálágan prošeavttaiguin nugo CAP-SHARE, SápmiDem, Syke: IKForest ja Rievdan -prošeavttaiguin sihke Sámi Duodjiin ja Siida Sámemuseain, muitala konferánssa ordnemiin vástideaddji Lifu Torikka.
– Sámenuoraid konferánsa ii leat ordnejuvvon máŋgga jahkái ja vaikko eat olahan ulbmila konferánssa oasseváldiid meari hárrái, de jáhkán ahte konferánsabeaivvit šaddet leat miellagiddevaččat ja seammás sáhttit ságastallat sámenuoraid sávaldagain ja dárbbuin nuoraide lágiduvvon doaimma hárrái, dadjá konfereanssa válmmaštallan bargojoavkku ságadoalli Niila-Juhán Valkeapää.
– Sávvat, ahte sámenuoraid čoahkkanemiin boađášedje jeavddalaš dáhpáhusat, gosa nuorat álkit sáhtášedje almmuhit iežaset almmá fuola haga ovdamearkka dihte dáhpáhusaid ruhtadeamis. Dán áigge eatnašat sámenuorain ásset bieđgguid ja nuorat ovttastallet hárvvibut nubbi nuppiin árgabeaivvi eallimis. Daiguin deaivvademiiguin nuorat čatnasit fierpmádahkii ja gávdnet ođđa ustibiid ja oahppásiid geain sáhttá ávkašuvvat maid boahtteáiggis, earet eará bargoeallimis, dadjaba Valkeapää ja Torikka.
Konferánssas gárvvistuvvo resolašuvdna árbevirolaš dieđu mearkkašumis sámenuoraide, mii addojuvvo dáhpáhusa loahpas Sámedikki ovddasteaddjái. Árbevirolaš diehtu lea eamiálbmogiid geahččanguovllus mearkkašahtti servoša resursa, mii nanne nu kultuvrralaš jotkkolašvuođa go servoša ceavzinnávccaid nuppástuvvi máilmmis. Dat ii leat dušše vássán áiggi muitu, muhto dat lea ealli, geavatlaš ja servodatlaš oassi árggas ja identitehtas. Erenomážit sámenuoraid rolla iežas kultuvrra árbevirolaš dieđu sirdimis ja oahppamis lea guovddážis, dasgo dat jotket kultuvrralaš dábiid ja heivehit daid dálá áiggi hástalusaide.
Konferánssa váldoordnejeaddjin doaibmá Sámedikki nuoraidráđđi. Nuoraidráđđi vástida nuoraidráđi oktavuođas iehčanasat doaibmi sierra sámenuoraid konferánssa ordnemis guovtti jagi gaskkaid dahje erenomáš siva dihte dávjjibut. Sámenuoraid konferánsa sáhttá addit iežas namas resolašuvnnaid, evttohusaid ja álgagiid, mat laktásit sámenuoraid eallindillái ja buresveadjimii. Konferánsa lea nuvttá ja rabas buot sámenuoraide.
Lassedieđut:
Nuoraidráđi prošeaktabargi
Lifu Torikka
Tel. 044 902 4833
lifu.torikka@samediggi.fi
Nuoraidráđi konferánssa bargojoavkku ságadoalli,
nuoraidráđi várreságadoalli
Niila-Juhán Valkeapää
niila-juhan.valkeapaa(at)samediggi.fi
Nuoraidčálli
Elli-Marja Hetta
tel. 050 382 5179
elli-marja.hetta(at)samediggi.fi
Nuoraidráđi váldobargun lea ovddidit sámenuoraid gielalaš ja kultuvrralaš vuoigatvuođaid birra Suoma ja nannet sámenuoraid gullevašvuođa sámekultuvrii. Nuoraidráđđi válmmaštallá maiddái daid Sámedikki cealkámušaid, álgagiid ja eará bealiváldimiid, mat gusket sámenuoraid dahje sámenuoraid eallindiliid.
